Ижтимоий тармоқларда Тошкент шаҳрининг Яшнобод туманидаги кўп қаватли турар жой биноларидан бирининг 4-қаватидан тушиб кетган қизнинг видеоси тарқалди.

Кадр: Telegram

Видеодан кўриш мумкинки, ўт ўчирувчилар қизни қутқаришга уринган, бироқ улар кўтарилишга улгурмасидан қиз йиқилиб тушган.

Telegram’даги TashkentLand каналининг ёзишича, кўнгилсиз ҳодиса 26 июнь куни туманнинг Алимкент манзилгоҳида (собиқ «Дубовая» кўчаси) содир бўлган.

«Қиз ёнғиндан қутулиш мақсадида ойнадан сакраган. Ўт ўчирувчилар ўсмирни қутқаришга улгурмай қолди», — дейилади хабарда.

Мазкур ҳодиса бўйича ФВВ ахборот берди. Унда айтилишича, воқеа Яшнобод тумани Алимкент 1-тор кўчасидаги кўп қаватли уйларнинг бирида содир бўлган. Аниқланишича, хонадондаги мебель жиҳозида (4 квадрат метр) ёнғин келиб чиққан. Натижада меҳмонга келган фуқаро С.А. уйнинг орқа томонидаги деразадан чиққан.

ФВВ ходимлари томонидан автонарвон ёрдамида қутқарув ишлари амалга оширилаётган вақтда аёлнинг қўллари толиқиб, тўртинчи қаватдан ўзини ташлаган. Фуқарога биринчи тиббий ёрдам кўрсатилиб, шифохонага етказилган.  Жабрланган фуқаро травматология бўлимига олиб борилганда, у маст ҳолда бўлганлиги маълум бўлган.

«Ҳодиса оқибатида С.А.га жиддий жароҳат етмаган. Ҳозирда унинг аҳволи ўнгланмоқда. Яқин кунлар ичида фуқарога жавоб берилади», — дейилади ФВВ хабарида.

Аввалроқ Татаристонда ўзбекистонлик талаба 5-қаватдан йиқилиб, ҳалок бўлгани тўғрисида хабар берилганди.