Ijtimoiy tarmoqlarda Toshkent shahrining Yashnobod tumanidagi ko‘p qavatli turar joy binolaridan birining 4-qavatidan tushib ketgan qizning videosi tarqaldi.
Videodan ko‘rish mumkinki, o‘t o‘chiruvchilar qizni qutqarishga uringan, biroq ular ko‘tarilishga ulgurmasidan qiz yiqilib tushgan.
Telegram’dagi TashkentLand kanalining yozishicha, ko‘ngilsiz hodisa 26-iyun kuni tumanning Alimkent manzilgohida (sobiq “Dubovaya” ko‘chasi) sodir bo‘lgan.
“Qiz yong‘indan qutulish maqsadida oynadan sakragan. O‘t o‘chiruvchilar o‘smirni qutqarishga ulgurmay qoldi”, — deyiladi xabarda.
Mazkur hodisa bo‘yicha FVV axborot berdi. Unda aytilishicha, voqea Yashnobod tumani Alimkent 1-tor ko‘chasidagi ko‘p qavatli uylarning birida sodir bo‘lgan. Aniqlanishicha, xonadondagi mebel jihozida (4 kvadrat metr) yong‘in kelib chiqqan. Natijada mehmonga kelgan fuqaro S.A. uyning orqa tomonidagi derazadan chiqqan.
FVV xodimlari tomonidan avtonarvon yordamida qutqaruv ishlari amalga oshirilayotgan vaqtda ayolning qo‘llari toliqib, to‘rtinchi qavatdan o‘zini tashlagan. Fuqaroga birinchi tibbiy yordam ko‘rsatilib, shifoxonaga yetkazilgan. Jabrlangan fuqaro travmatologiya bo‘limiga olib borilganda, u mast holda bo‘lganligi ma’lum bo‘lgan.
“Hodisa oqibatida S.A.ga jiddiy jarohat yetmagan. Hozirda uning ahvoli o‘nglanmoqda. Yaqin kunlar ichida fuqaroga javob beriladi”, — deyiladi FVV xabarida.
Avvalroq Tataristonda o‘zbekistonlik talaba 5-qavatdan yiqilib, halok bo‘lgani to‘g‘risida xabar berilgandi.
Izoh (0)