73 ёшли Арнольд Шварценеггернинг 65 ёшли рафиқаси, журналист Мария Шрайвер билан ажрашиш жараёни ниҳоясига етиш арафасида. Жуфтликнинг мол-мулкни тасдиқлаш ҳақидаги ҳужжатга имзо қўйиши қолган холос.

Фото: Glamour

2011 йилда актёр турмуш ўртоғининг олдида уй хизматчиси Милдред Патрисия Баендан никоҳсиз ўғли бор эканини тан олган. Жуфтлик ажрашиш учун судга ўша вақт мурожаат қилган, аммо бу анча вақтга чўзилган.

Ва ниҳоят ажрашиш жараёни якунига етаётган Арнольд ва Мария барча масалаларга дўстона ечим топишга уринмоқда. Фарзандлари аллақачон вояга етгани учун жуфтликнинг васийликни ҳал қилишига ҳожат йўқ. Ягона муаммо молиявий масалалар юзасидан келиб чиққан. Турмуш қурганида никоҳ шартномасини имзоламагани сабаб собиқ мол-мулк тенг бўлиниши керак. Норасмий маълумотларда Арнольд ва Мариянинг мулки 400 миллион долларни ташкил қилиши айтилади.

Актёр судга ошкор қилиш тўғрисидаги баёнотни топширган, энди сўнгги юриш Мариядан. Агар келишув актёрнинг рафиқаси томонидан имзоланса, улар расман ажрашиши мумкин бўлади.

Маълумот учун, Арнольд АҚШнинг 35-президенти Жон Кеннедининг жияни Мария билан 1977 йилда танишган. Танишишганидан 9 йил ўтиб, турмуш қурган жуфтликнинг тўрт нафар: 31 ёшли Кетрин, 29 яшар Кристина, 27 ёшли Патрик ва 23 яшар Кристофер исмли фарзандлари бор.