Ўзбекистонда коронавирус билан касалланиш ҳолати ортаётганлиги сабабли охирги 10-15 кун ичида Зангиота туманидаги юқумли касалликлар шифохонасига беморлар мурожаатлари нисбатан кўпайди. Бу ҳақда Зангиота 1-сон юқумли касалликлар шифохонаси директори Анвар Ҳусанов ССВ матбуот хизматига маълум қилди.

Фото: «Дарё» / Мадина Нурман

«Афсуски, сўнгги кунларда мамлакатимиз, хусусан, пойтахтимиздаги эпидемиологик вазиятнинг бироз мураккаблашиши Зангиота туманидаги 1-сон юқумли касалликлар шифохонаси фаолиятига ҳам таъсир этмай қолмади. Айниқса, охирги икки ҳафта давомида тиббиёт муассасамизга мурожаат қилувчи беморлар сони кескин ортгани, биз шифокорларни жиддий ташвишга солмоқда. Хусусан, айни пайтда 2016 та ўринга эга бўлган шифохонада 1400 нафардан ортиқ бемор белгиланган стандартлар бўйича даволанмоқда», — деган Анвар Ҳусанов.

Унинг айтишича, шифохонада 6 та реанимация бўлими бор ва уларда 232 та ўрин ташкил қилинган. Ҳозирги кунда ушбу реанимация бўлимларида 203 нафар бемор белгиланган стандартлар бўйича даволанмоқда. Бўш ўринлар сони эса 29 тани ташкил этмоқда.

Реанимация бўлимидаги ҳар бир койка сунъий ўпка вентиляцияси ва замонавий даволаш аппаратлари билан жиҳозланган. Шу билан бирга, ҳар бир бўлимда санитар ўтказгич ташкил қилинган.

Эслатиб ўтамиз, 21 июнь куни «Ўзбекистон 24» телеканали томонидан тайёрланган лавҳада Зангиотадаги 1 ва 2-юқумли касалликлар шифохонасига бўлаётган мурожаатлар сўнгги кунларда икки баробарга ошгани маълум қилинганди.

Соғлиқни сақлаш вазирлиги маълумотларига кўра, 26 июнь куни 493 кишида коронавирус аниқланиб, мамлакатда COVID-19 расман қайд этилганлар сони 109 223 нафарга етди. 25 июнь куни коронавирус инфекциясини юқтириб олиш билан боғлиқ 546 та янги ҳолат рўйхатга олиниб, кунлик касалланиш бўйича 2021 йилнинг энг юқори кўрсаткичи бўлганди.

Мамлакатда кунлик касалланиш ҳолатлари сони яна ортаётганлиги сабабли Республика бўйлаб 28 июндан карантин чекловлари кучайтирилади. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилади. Бундан ташқари, Тошкентда 18 ёшдан ошганлар 28 июндан коронавирусга қарши оммавий эмланади.