Ўзбекистонда ҳар йили июнь ойида ўтказиладиган гиёҳвандликка қарши курашиш ойлиги доирасида ДХХ ходимлари томонидан тезкор тадбирлар ўтказилиб, катта миқдордаги гиёҳванд моддаларни мусодара қилинди. Бу ҳақда «Дарё»га ДХХ матбуот хизмати хабар берди.

Фото: ДХХ матбуот хизмати

ДХХнинг Сирдарё ва Самарқанд вилоятлари бўйича бошқармалари ходимлари Сирдарё вилояти божхона бошқармаси вакиллари билан ҳамкорликда Қашқадарё вилоятининг Чироқчи туманидаги «Умакай» ЙПХ масканида ўтказилган тезкор тадбирда Сурхондарё—Самарқанд йўналишида ҳаракатланаётган Cobalt автомашинаси тўхтатилган.

Автомашина кўздан кечирилганда унда йўловчи сифатида кетаётган Сурхондарё вилояти Сариосиё туманида яшовчи, 1987 йилда туғилган фуқаронинг ёнида 3 килограмм 363 грамм опий гиёҳванд моддаси борлиги аниқланиб, тегишли тартибда расмийлаштириб олинган.

Бошқа бир ҳолатда ДХХ ходимлари томонидан Тошкент вилоятининг Тошкент туманида жойлашган «Минерал сувлар» ЙПХ масканида Сурхондарё вилоятининг Денов туманида яшовчи, 1996 йилда туғилган шахс бошқарувидаги Nexia-3 тўхтатилган. Автомашина холислар иштирокида кўздан кечирилганда унинг салон қисмида 5 килограмм опий гиёҳванд моддаси борлиги аниқланиб, процессуал тарзда расмийлаштириб олинган.

ДХХнинг Қашқадарё ва Тошкент вилоятлари бўйича бошқармалари ходимлари томонидан ДБҚ ходимларини жалб этган ҳолда Ўрта Чирчиқ туманида ўтказилган тезкор тадбирда эса Бекобод шаҳрида яшовчи шахслар — 1991 йилда туғилган фуқаро ҳамда муқаддам гиёҳванд моддалар савдоси билан боғлиқ жиноят содир этганлиги учун жиноий жавобгарликка тортилган 1990 йилда туғилган шахс 492 грамм гашиш моддасини 50 миллион сўмга сотганида қўлга олинган.

Таъкидланишича, ҳар учала ҳолатда ҳам наркотик моддалар Ўзбекистонга Тожикистондан контрабанда йўли билан олиб ўтилган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Аввалроқ ДХХ Бухоро, Фарғона ва Наманган вилоятларида гиёҳванд моддалар савдоси билан шуғулланган бир неча шахсни қўлга олгани ҳақида хабар берилган эди.