Британиялик кўча рассоми Бэнкси «Бомба билан қучоқлашиш» ва «Севиб қолган каламуш» картиналарининг интеллектуал эгалик ҳуқуқидан маҳрум бўлди. Сўнгги 10 ой ичида у жами олтита картинасининг эгалик ҳуқуқидан айрилган. Бу ҳақда Европа Иттифоқи Интеллектуал мулк идораси (EUIPO) қарорига таяниб, Esquire хабар берди.
Фото: Legion Media
Шундай қилиб, рассом эндиликда «Ҳозир кул» (2003 йил), «Радарли каламуш» (2004 йил), «Соябонли қиз» (2008 йил) ва «Ранглар ирғитувчиси» (2003 йил) картиналарининг мутлақ эгаси бўла олмайди. Тасвирлардан Европа Иттифоқи ҳудудида бепул фойдаланиш мумкин.
Бэнкси «Бомба билан қучоқлашиш» ва «Севиб қолган каламуш» картиналарига эгалик ҳуқуқини откриткалар ишлаб чиқарувчи Full Colour Black’нинг даъвосига кўра қабул қилинган қарор бўйича йўқотган. Иккала ҳолатда ҳам патент идораси компания тарафини олган ва ўз картиналарини товар белгиси сифатида рўйхатдан ўтказиб, бироқ уни сотиш мақсадида бўлмаган рассомнинг ҳаракатларини «виждонсизлик» деб атаган. Оқибатда Бэнксининг вакиллари 1850 фунт миқдорида жаримага тортилган.
Экспертларнинг ҳисоблашича, Бэнкси баҳсли ишларда муаллифлик ҳуқуқини қўлга киритиш учун шахсини ошкор этиши керак. Фақат шу орқали у ўз картиналарини ҳаётлиги ва ўлимидан кейинги 70 йил давомида сақлаб қолиши мумкин.
Full Colour Black 2019 йили юридик жараёнларни бошлаган вақтда Бэнкси юристлар маслаҳатига кириб, муаллифлик ҳуқуқининг бузилишидан ҳимояланиш мақсадида Лондонда Gross domestic product номли сувенирлар дўконини очган ва ўз савдо маркаси остидаги товарларини сота бошлаган. Дўкон кириш қисмисиз кўргазма зали кўринишида бўлган ва бир неча ҳафта фаолият юритган, шундан сўнг у ердаги ишлар махсус сайт орқали сотувга қўйилган.
Аввалроқ Нью-Йоркда Бэнксининг асари 95 минг долларга сотиб олингани ва криптовалютага айлантириш мақсадида ёқиб юборилгани тўғрисида хабар берилганди.
