Жонс Ҳопкинс университети маълумотларига кўра, дунёда COVID-19’га чалинганлар сони 177 372 117 кишига етди, шуларнинг 3 840 704 нафари вафот этган. Вирус билан касалланиш ҳолатлари энг кўп АҚШда (33,5 миллион), Ҳиндистонда (29,7 миллион), Бразилияда (17,7 миллион), Францияда (5,8 миллион) ва Туркияда (5,3 миллион) қайд этилган.

COVID-19 пандемиясига қарши курашаётган шифокорларга бағишланган деворий тасвир. Непал, Катманду, 9 июнь

Фото: Зума

Коронавирусга қарши тўлиқ эмланмаган Кувайт фуқаролари мамлакатдан чиқарилмайди

Кувайт ҳукумати 17 июнь куни коронавирус пандемиясига қарши кураш бўйича янги чоралар ҳақида эълон қилди ва тўлиқ вакцинация қилинмаган фуқароларнинг амирликдан чиқишини тақиқлади, шунингдек, мамлакатга кириш бўйича ҳам муайян чекловлар жорий қилинди. Янги қоидалар 1 августдан кучга киради.

Кувайтни тарк этиш учун фуқаролар мамлакатда маъқулланган вакциналардан бири билан тўлиқ эмланиши керак бўлади.

Бундан ташқари, Кувайт фуқаролигига эга бўлмаган аҳолининг мамлакатга кириши учун ҳам тўлиқ вакцинация ва манфий натижали ПЗР-тест талаб қилинади.

Россияда сақич шаклидаги коронавирусга қарши дори ишлаб чиқилмоқда

Россия Мудофаа вазирлиги Марказий илмий-тадқиқот институти COVID-19’га қарши сақич кўринишидаги дорини ишлаб чиқишни бошлади. Бу коронавирусга қарши чайналадиган таблетка ва пастила шаклидаги мукозал (шиллиқ қаватда иш берадиган) вакцинадир.

Синовлардан кейин дори коронавирус инфекциясини даволаш ва олдини олиш бўйича турли схемаларга киритилиши кутилмоқда.

Индонезияда COVID-19’га қарши эмланганларга товуқ совға қилинмоқда

Индонезиянинг қишлоқ жойларида маҳаллий аҳолини вакцина олишга жалб қилиш учун эмланганларга жўжалар тарқатилмоқда.

Ява ороли ғарбидаги Чианжур округида жорий қилинган дастурга мувофиқ, 45 ёшдан ошганларга эмланиб бўлганидан кейин товуқ ҳадя қилинмоқда. Ушбу ташаббусдан сўнг эмланиш истагида бўлганлар сони ўн марта ошиб кетди.

Таъкидланишича, Индонезия — пандемиядан энг кўп зарар кўрган мамлакатлардан бири. У ерда 2 миллиондан ортиқ одам касалликка чалиниб, шуларнинг 53 мингдан зиёди вафот этган. Сўнгги ҳафталарда Ява ва Суматра оролларида касалланганлар сонининг кескин ошиши кузатилмоқда.

Лиссабон кириш ва чиқиш учун ёпилади

Португалия пойтахтида коронавирус инфекциясининг авж олиши қайд этилаётгани сабабли дам олиш кунлари шаҳарга кириш ва ундан чиқиш мумкин бўлмайди. 18 июндан кучга кирувчи тақиқ Лиссабон аэропортидан учадиган рейсларга ва хизмат сафарларига таъсир қилмайди. Аммо шаҳарга кираверишда полиция назорат пунктлари ўрнатилади.

Экспертлар фикрича, Лиссабон ҳудудида вирус авж олиши Делта штаммининг тарқалиши билан боғлиқ.

Дунё бўйича қўлланилган COVID-вакциналар 2,5 миллиард дозадан ошди

Дунёнинг барча мамлакатларида 2,5 миллиард дозадан ортиқ вакцина қўлланилди.

COVID-19’га қарши вакциналар энг кўп Хитойда (945 миллион), АҚШда (312 миллион), Ҳиндистонда (265 миллион), Бразилияда (81 миллион), Буюк Британия (72 миллион), Германия (63 миллион), Франция (45 миллион), Италия (43 миллион), Мексика (38 миллион), Туркия (38 миллион) ва Испанияда (34 миллион) қўлланилган.

Киритилган дозаларнинг аҳоли сонига нисбати бўйича Бирлашган Араб Амирликлари етакчилик қилмоқда, у ерда ҳар 100 кишига тахминан 142,24 доза вакцина қўлланилган.