Jons Hopkins universiteti ma’lumotlariga ko‘ra, dunyoda COVID-19’ga chalinganlar soni 177 372 117 kishiga yetdi, shularning 3 840 704 nafari vafot etgan. Virus bilan kasallanish holatlari eng ko‘p AQShda (33,5 million), Hindistonda (29,7 million), Braziliyada (17,7 million), Fransiyada (5,8 million) va Turkiyada (5,3 million) qayd etilgan.
Koronavirusga qarshi to‘liq emlanmagan Kuvayt fuqarolari mamlakatdan chiqarilmaydi
Kuvayt hukumati 17-iyun kuni koronavirus pandemiyasiga qarshi kurash bo‘yicha yangi choralar haqida e’lon qildi va to‘liq vaksinatsiya qilinmagan fuqarolarning amirlikdan chiqishini taqiqladi, shuningdek, mamlakatga kirish bo‘yicha ham muayyan cheklovlar joriy qilindi. Yangi qoidalar 1-avgustdan kuchga kiradi.Kuvaytni tark etish uchun fuqarolar mamlakatda ma’qullangan vaksinalardan biri bilan to‘liq emlanishi kerak bo‘ladi.
Bundan tashqari, Kuvayt fuqaroligiga ega bo‘lmagan aholining mamlakatga kirishi uchun ham to‘liq vaksinatsiya va manfiy natijali PZR-test talab qilinadi.
Rossiyada saqich shaklidagi koronavirusga qarshi dori ishlab chiqilmoqda
Rossiya Mudofaa vazirligi Markaziy ilmiy-tadqiqot instituti COVID-19’ga qarshi saqich ko‘rinishidagi dorini ishlab chiqishni boshladi. Bu koronavirusga qarshi chaynaladigan tabletka va pastila shaklidagi mukozal (shilliq qavatda ish beradigan) vaksinadir.Sinovlardan keyin dori koronavirus infeksiyasini davolash va oldini olish bo‘yicha turli sxemalarga kiritilishi kutilmoqda.
Mavzuga doir: Moskvada “Sputnik V” vaksinasining burunga tomiziladigan shakli va yangi “Sputnik Layt” vaksinasi sinovdan o‘tkaziladi
Indoneziyada COVID-19’ga qarshi emlanganlarga tovuq sovg‘a qilinmoqda
Indoneziyaning qishloq joylarida mahalliy aholini vaksina olishga jalb qilish uchun emlanganlarga jo‘jalar tarqatilmoqda.Yava oroli g‘arbidagi Chianjur okrugida joriy qilingan dasturga muvofiq, 45 yoshdan oshganlarga emlanib bo‘lganidan keyin tovuq hadya qilinmoqda. Ushbu tashabbusdan so‘ng emlanish istagida bo‘lganlar soni o‘n marta oshib ketdi.
Ta’kidlanishicha, Indoneziya — pandemiyadan eng ko‘p zarar ko‘rgan mamlakatlardan biri. U yerda 2 milliondan ortiq odam kasallikka chalinib, shularning 53 mingdan ziyodi vafot etgan. So‘nggi haftalarda Yava va Sumatra orollarida kasallanganlar sonining keskin oshishi kuzatilmoqda.
Mavzuga doir: Indoneziya minglab davlat xizmatchilarini masofadan ishlash uchun Bali oroliga yuboradi
Lissabon kirish va chiqish uchun yopiladi
Portugaliya poytaxtida koronavirus infeksiyasining avj olishi qayd etilayotgani sababli dam olish kunlari shaharga kirish va undan chiqish mumkin bo‘lmaydi. 18-iyundan kuchga kiruvchi taqiq Lissabon aeroportidan uchadigan reyslarga va xizmat safarlariga ta’sir qilmaydi. Ammo shaharga kiraverishda politsiya nazorat punktlari o‘rnatiladi.Ekspertlar fikricha, Lissabon hududida virus avj olishi Delta shtammining tarqalishi bilan bog‘liq.
Dunyo bo‘yicha qo‘llanilgan COVID-vaksinalar 2,5 milliard dozadan oshdi
Dunyoning barcha mamlakatlarida 2,5 milliard dozadan ortiq vaksina qo‘llanildi.COVID-19’ga qarshi vaksinalar eng ko‘p Xitoyda (945 million), AQShda (312 million), Hindistonda (265 million), Braziliyada (81 million), Buyuk Britaniya (72 million), Germaniya (63 million), Fransiya (45 million), Italiya (43 million), Meksika (38 million), Turkiya (38 million) va Ispaniyada (34 million) qo‘llanilgan.
Kiritilgan dozalarning aholi soniga nisbati bo‘yicha Birlashgan Arab Amirliklari yetakchilik qilmoqda, u yerda har 100 kishiga taxminan 142,24 doza vaksina qo‘llanilgan.
Izoh (0)