Сирдарё вилоятининг Ховос туманида 3 нафар фуқарони Гулистон давлат университетига ўқишга киритиб қўйиш учун улардан 6,4 минг доллар пул олган шахслар ушланди. Бу ҳақда Бош прокуратура ҳузуридаги департамент хабар берди.
Маълум қилинишича, Бош прокуратура ҳузуридаги департаментнинг Ховос туман бўлими томонидан фуқароларнинг ҳуқуқ ва манфаатларини ҳимоя қилиш юзасидан терговга қадар текширув ўтказилган.
Ховос туманида яшовчи фуқаро О.А. ва бошқалар олдиндан тил бириктириб, 3 нафар фуқарони ўзларининг Гулистон давлат университетида ишловчи Ш. исмли таниши орқали университетнинг сиртқи бўлимига ўқишга киритиб қўйишни ваъда қилган. Бунинг эвазига улардан 6,4 минг доллар қўлга киритган.
Бундан ташқари, қўлга олинган шахслар фуқаро З.А.га 3,5 миллион сўм ва У.М.га 9,1 миллион сўм пулни «контракт тўловлари» учун тўлатиб, уларга талабалар сафига қабул қилингани тўғрисида сохта буйруқларни тақдим этгани аниқланган.
Мазкур ҳолат юзасидан Жиноят кодексининг 168-моддаси (фирибгарлик) 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент давлат юридик университетига киритиб қўйиш учун 10 минг доллар сўраган шахс ушлангани, Фарғонада Кореядаги университетга имтиҳонсиз киритиб қўйишни ваъда қилиб, мактаб ўқувчиларидан жами 20 млн сўм олган шахслар аниқлангани, ТАТУнинг Самарқанд филиали бўлими бошлиғи 3 минг доллар пора билан қўлга тушгани тўғрисида хабар берилганди.
Мавзуга доир:
Изоҳ (0)