Қашқадарё вилоятининг Қарши туманида яшовчи фуқаро фарзандларининг моддий таъминоти учун хотинига уй берган бўлса, Китоб туманида яшовчи фуқаро алиментни валютада тўлади. Бу ҳақда «Дарё»га МИБнинг вилоят бошқармаси ахборот хизмати хабар берди.

Фуқаролик ишлари бўйича Қарши туманлараро судининг 2021 йил 3 февралдаги буйруғига асосан қарздор З.Ш.дан ундирувчи А.Я. фойдасига икки нафар фарзандининг моддий таъминоти учун алимент ундириш белгиланган. Ушбу ижро ҳужжати ижро қилиш учун МИБнинг Қарши туман бўлими иш юритувига келиб тушган ва шу куннинг ўзида ижро иши юритиш тўғрисида қарор қабул қилиниб, тарафларга маълум қилинган. Қарздор алимент пулларини ўз вақтида ойма-ой тўлаб бориши лозимлиги тўғрисида огоҳлантирилган.

«Бири тўрт ярим ёш ва яна бири эса ҳали етти ойлик фарзандлари таъминотини ўйлаган ота 18 йил мобайнида алимент тўлашдан кўра, фарзандларига уй беришни лозим топди. Собиқ эр хотини билан ўзаро келишиб, умумий майдони 181 метр квадрат бўлган тўрт хонали уйни турмуш ўртоғининг номига расмийлаштириб берди», — дейди Гулноза Дилмуродова.

Қўшимча маълумот берилишича, вилоятнинг Китоб туманида яшовчи ота ҳам Шаҳрисабз туманлараро судининг 2017 йил 6 мартдаги суд буйруғига асосан ундирувчи М.У. фойдасига икки нафар вояга етмаган фарзандининг моддий таъминоти учун алимент тўлаб келган.

«МИБга мурожаат қилган ота фарзандлари вояга етгунига қадар бўлган алимент пулларини тўлаш истагини билдириб, ундирувчи билан ўзаро келишган ҳолда жами 6500 доллар пулни тўлаб берди. Ушбу пуллар тилхат асосида болаларнинг онасига топширилди», — дейилади бюро ахборот хизмати хабарномасида.