Qashqadaryo viloyatining Qarshi tumanida yashovchi fuqaro farzandlarining moddiy ta’minoti uchun xotiniga uy bergan bo‘lsa, Kitob tumanida yashovchi fuqaro alimentni valyutada to‘ladi. Bu haqda “Daryo”ga MIBning viloyat boshqarmasi axborot xizmati xabar berdi.
Fuqarolik ishlari bo‘yicha Qarshi tumanlararo sudining 2021-yil 3-fevraldagi buyrug‘iga asosan qarzdor Z.Sh.dan undiruvchi A.Ya. foydasiga ikki nafar farzandining moddiy ta’minoti uchun aliment undirish belgilangan. Ushbu ijro hujjati ijro qilish uchun MIBning Qarshi tuman bo‘limi ish yurituviga kelib tushgan va shu kunning o‘zida ijro ishi yuritish to‘g‘risida qaror qabul qilinib, taraflarga ma’lum qilingan. Qarzdor aliment pullarini o‘z vaqtida oyma-oy to‘lab borishi lozimligi to‘g‘risida ogohlantirilgan.“Biri to‘rt yarim yosh va yana biri esa hali yetti oylik farzandlari ta’minotini o‘ylagan ota 18 yil mobaynida aliment to‘lashdan ko‘ra, farzandlariga uy berishni lozim topdi. Sobiq er xotini bilan o‘zaro kelishib, umumiy maydoni 181 metr kvadrat bo‘lgan to‘rt xonali uyni turmush o‘rtog‘ining nomiga rasmiylashtirib berdi”, — deydi Gulnoza Dilmurodova.
Qo‘shimcha ma’lumot berilishicha, viloyatning Kitob tumanida yashovchi ota ham Shahrisabz tumanlararo sudining 2017-yil 6-martdagi sud buyrug‘iga asosan undiruvchi M.U. foydasiga ikki nafar voyaga yetmagan farzandining moddiy ta’minoti uchun aliment to‘lab kelgan.
“MIBga murojaat qilgan ota farzandlari voyaga yetguniga qadar bo‘lgan aliment pullarini to‘lash istagini bildirib, undiruvchi bilan o‘zaro kelishgan holda jami 6500 dollar pulni to‘lab berdi. Ushbu pullar tilxat asosida bolalarning onasiga topshirildi”, — deyiladi byuro axborot xizmati xabarnomasida.
Izoh (0)