Қашқадарёдаги боғчаларда 2021 йилнинг дастлабки чорагида 400 миллион сўмдан зиёд маблағ талон-торож қилинди, дея хабар бермоқда вилоят ҳокимлиги ахборот хизмати.

Маълум қилинишича, вилоятда 1694 та мактабгача таълим ташкилоти бор.

Қайд қилинишича, вилоятда мактабгача таълим ташкилотлари сонини кўпайтириш орқали уларда бола қамровини ошириш, янги иш ўринларини яратиш, давлат томонидан берилаётган имтиёзлардан самарали фойдаланишни йўлга қўйиш ишлари бир неча бор огоҳлантиришларга қарамасдан ўз самарасини бермаяпти.

Жумладан, 2019 йилда 248 миллион сўм талон-торож қилиниб, 21 миллион сўм нотўғри харажат қилинган. 2020 йилда 326 миллион сўм талон-торож қилиниб, 120 миллион сўм нотўғри сарф қилинган, 2021 йилнинг биринчи чорагида эса 412 миллион сўм талон-торож қилиниб, 205 миллион сўм бюджет маблағлари нотўғри сарф қилинган.

Бундан аввал Тошкентда МИБ ходими икки йилда 596 миллион сўмни ўзлаштириб юборгани маълум бўлгани, Бухорода фермер хўжаликларига ажратилган салкам 150 миллион сўмлик дизель ёқилғисини талон-торож қилган шахсларга жиноят иши қўзғатилгани ҳамда Жиззах вилояти ҳокимининг собиқ ўринбосари Акрам Раҳмонқулов ва унинг 10 нафар жиноий шериклари қамоққа олингани маълум қилингани ҳақида хабар қилинганди.