Ўзбекистон Президенти Шавкат Мирзиёев 31 май куни туризм, шаҳар инфратузилмаси, саноат соҳаларидаги лойиҳалар ҳамда Алишер Навоий мақбарасини таъмирлаш ва тиклаш борасида амалга оширилаётган ишлар тақдимоти билан танишди. Бу ҳақда Президент матбуот хизмати хабар берди.
Лойиҳалардан бири Чирчиқ дарёси бўйида турли инфратузилма объектлари барпо этишга оид. Мазкур дарёнинг Тошкент шаҳридан ўтган қисми 16 километрни ташкил этади. Лойиҳага кўра, дарё ўзани қисқартирилиб, қирғоқлари ободонлаштирилади. Бунинг эвазига очиладиган майдонларда замонавий уй-жойлар, дам олиш масканлари, ишлаб чиқариш ва хизмат кўрсатиш иншоотлари қурилиши режалаштирилган.
Яна бир лойиҳа Тошкент халқаро аэропортидан шаҳар марказига ўтишдаги кўприкни кенгайтиришга қаратилган. Ҳозирги йўл ўтказгич 1967 йилда қурилган. Пойтахт ривожланиши ва транспортлар сони ошиши билан уни реконструкция қилиш эҳтиёжи пайдо бўлди. Шу боис ушбу кўприкнинг кичик ҳалқа йўли билан кесишган жойида айланма шаклдаги йўл ўтказгич қуриш режалаштирилган. Унинг узунлиги 650, эни 30 метр бўлиши мўлжалланган.
Бу муҳандислик ечими автотранспортларнинг кўприкка чиқиши ва тушишини осонлаштиради. Йўл ҳаракати хавфсизлигини таъминлайди. Бу ердаги қулайлик яқин атрофдаги кўчаларга ҳам таъсир қилиб, тирбандлик камайишида муҳим омил бўлади.
Шунингдек, давлат раҳбарига пойтахтдаги Texnopark’да амалга оширилиши режалаштирилган инвестиция лойиҳалари тақдим қилинди.
Хусусан, ушбу ҳудудда йилига 1 миллион дона кир ювиш машинаси, 15 минг тонна мис қувур, 3000 дона саноат сув иситиш ускунаси, 75 минг дона савдо совутгичи ва музлатгичи, 1 миллион квадрат метр HPL-панеллар ва полиизоцианурат қатламли сендвич-панеллар, 30 минг тонна базальт тошдан изоляция маҳсулотларини ишлаб чиқариш бўйича қувватлар ташкил этиш режалаштирилган.
2021 йил охиригача ишга тушириладиган лойиҳалар натижасида 2 мингдан зиёд иш ўрни яратилади.
Миллий боғ ҳудудида барпо этилаётган Magic City маданият ва истироҳат боғининг иккинчи босқичи доирасида амалга ошириладиган ишлар тўғрисида ҳам маълумот берилди.
Лойиҳа концепциясига мувофиқ боғ ҳудудида сунъий кўл ташкил этилади ва унинг атрофида мамлакатнинг тарихий ва диққатга сазовор масканларига бағишланган тематик шаҳарча қурилади.
Президент буюк шоир Алишер Навоий мақбарасини таъмирлаш ва тиклаш, унинг атрофини ободонлаштириш лойиҳасига алоҳида эътибор қаратди.
Афғонистоннинг Ҳирот шаҳридаги Алишер Навоий мақбараси мажмуасида қурилиш ва ободонлаштириш ишларини амалга ошириш имкониятларини ўрганиб чиқиш вазифаси Президентнинг 2020 йил 19 октябрдаги «Буюк шоир ва мутафаккир Алишер Навоий таваллудининг 580 йиллигини кенг нишонлаш тўғрисида»ги қарорида белгиланган эди.
Ушбу топшириқ ижросини таъминлаш доирасида Ўзбекистон мутахассислари афғонистонлик ҳамкасблари билан биргаликда мақбарани жойида ўрганди. Ўрганишлар натижасида анъанавий меъморчилик, санъат ва безак элементларидан фойдаланган ҳолда мақбарани таъмирлаш ва тиклаш лойиҳаси ишлаб чиқилди.
Тақдим этилган лойиҳага кўра, мақбаранинг кириш ва қолган йўлакларига ҳазрат Навоийнинг ҳикматли сўзлари битилган китоб кўринишидаги белгилар қўйилади ҳамда декоратив ўтиргичлар ўрнатилади.
Кириш қисмида саккиз бурчакли масжид бунёд этилади. Кириш пештоқидан ҳовли қисмининг чап ва ўнг томонида ёпиқ услубда айвонлар барпо этилади. Мақбаранинг ташқи кўринишига безак берилади. Гумбаз, мақбара олди ва ён қисмлари майолика элементлари билан ишланади. Мажмуа ҳудуди кўкаламзорлаштирилади.Давлат раҳбари лойиҳалар билан танишиб, мутасаддиларга уларни сифатли амалга ошириш бўйича кўрсатмалар берди.
Бундан аввал Шавкат Мирзиёев стандартлаштириш, сертификатлаш ва метрология миллий тизимини такомиллаштириш чора-тадбирлари тақдимоти билан танишгани, Шавкат Мирзиёев «Яшил ўсиш ва глобал мақсадлар учун ҳамкорлик—2030» халқаро саммитида иштирок этгани ҳамда Шавкат Мирзиёев Россия соғлиқни сақлаш вазири Михаил Мурашкони қабул қилгани ҳақида хабар берилганди.
Изоҳ (0)