Шавкат Мирзиёев 25 май куни ўтказилган видеоселектор йиғилишида иссиқлик таъминоти тизимидаги муаммоларга тўхталиб ўтди, деб хабар бермоқда «Gazeta.uz».
Фото: «Gazeta.uz»
Давлат раҳбари уй-жой коммунал хизмат кўрсатиш вазири ўринбосари в.б. Қурбон Турсуновга иссиқлик таъминоти тизимини модернизация қилишга «мутлақо янги ёндашувларни» жорий этиш шарти билан олти ой синов муддати берди.
Президентнинг сўзларига кўра, республика бўйича марказлашган иссиқлик тизимларига уланган 15 мингта (40 фоиз) турар жойдан 2 минг километр иссиқлик тармоғи (50 фоиз) яроқсиз аҳволда, оқибатда тармоқдаги йўқотишлар ўртача 40 фоизни ташкил этмоқда.
Шавкат Мирзиёев Қурбон Турсунов, Тошкент вилояти ҳокими Даврон Ҳидоятов, Фарғона вилояти ҳокими Хайрулло Бозоров, Наманган вилояти ҳокими Шавкат Абдураззоқов, Бухоро вилояти ҳокими Ботир Зарипов ва Самарқанд вилояти ҳокими Эркинжон Турдимовга 56 та қозонхона қуриш ва реконструкция қилиш, 205 километр тармоқларни таъмирлаш орқали 2 мингдан ортиқ кўп қаватли уйларни марказлаштирилган иссиқлик таъминоти тизимига улаш топшириғини берди.
Тошкент вилоятида — 1,1 мингта, Фарғонада — 131 та, Наманганда — 350 та, Бухорода — 202 та, Самарқандда — 93 та кўп қаватли уй-жойларда марказлаштирилган иссиқлик тизими тикланиши кутилмоқда.
«Янги кўп қаватли уйларни, яхлит массив шаклида қуришдан мақсад ҳам, энергоресурсларни, инфратузилма харажатларини иқтисод қилиш ҳисобланади. Лекин бу бўйича вазирликда ҳам, ҳудудларда ҳам ҳалигача ягона ёндашув йўқ», — деган Шавкат Мирзиёев.
Масъул шахслар энергосамарадорликни 57 фоиздан 92 фоизга кўтариш, тармоқдаги йўқотишларни 35 фоиздан 3,5 фоизга тушириш имконини берувчи қозонхоналарни модернизация қилиш дастурини тайёрлаши лозим.
«Умуман, уй-жой коммунал хизмат кўрсатиш вазири Қурбон Турсунов жорий йилнинг ўзида 183 та мавзеда қурилаётган 40 мингта хонадонни марказлаштирилган иситиш тизимига ўтказишни ўйлаши зарур», — деган Шавкат Мирзиёев.
Президент топшириғи билан бош вазир биринчи ўринбосари Очилбой Раматов, бош вазир ўринбосари Жамшид Қўчқоров, уй-жой ва коммунал хизмат кўрсатиш вазири Шерзод Ҳидоятов ва молия вазири Тимур Ишметов бир ой муддатда турар жойларнинг марказлашган иссиқлик таъминотини тиклаш, уларни замонавий тизимларга ўтказиш, бунга хусусий секторни кенг жалб қилиш бўйича таклиф киритиши лозим.
Ҳисоб-китобларга кўра, Тошкент шаҳри иссиқлик таъминотини «ёпиқ тизим»га ўтказиш йилига 3 миллион гигакалория иссиқлик йўқотишни (420 миллиард сўм), 320 миллион кубметр (210 миллиард сўм) табиий газ ҳамда 85 миллион киловатт (40 миллиард сўм) электр сарфини қисқартириш имконини беради. Бундан кўрсаткичлар 2019 йилнинг октябрида ҳам айтилган.
Қурбон Турсунов, Наманган вилояти ҳокими Шавкат Абдураззоқов ва Тошкент вилояти ҳокими даврон Ҳидоятовга 1 ноябрга қадар Наманган ва Чирчиқ шаҳарларида марказлашган иссиқлик таъминотининг «намунавий тажрибаси»ни яратиш топширилди.
Президент 2019 йилнинг октябрида Тошкентни иссиқлик таъминотини ёпиқ тизимга ўтказиш (иссиқ сув етказиб бериш вақти 10−20 сониягача тезлашиши керак), бошқа шаҳарларда иссиқлик таъминотини тиклаш ва барча хусусий уйларни иссиқлик билан таъминлаш бўйича чора-тадбирларни ишлаб чиқиш бўйича кўрсатмалар берган эди.
2020 йил январь ойида Жанубий Кореянинг CM Entech компанияси Тошкент шаҳрида иссиқлик таъминоти тизимини модернизация қилиш, хусусан, Мирзо Улуғбек туманининг 2-иссиқлик маркази реконструкцияси лойиҳаларини таклиф қилган эди. Лойиҳа қиймати 70-100 миллион долларга баҳоланган.
