АҚШ Миллий хавфсизлик агентлиги (NSA) Германия, Швеция, Норвегия ва Франция сиёсатчиларининг мулоқотлари тўғрисидаги маълумотларни Даниядан бошқа мамлакатларга ўтган интернет кабеллари ёрдамида қўлга киритган. Бу ҳақда Даниянинг DR телерадиокомпанияси томонидан Европа нашрлари билан биргаликда олиб борилган текширувда айтилган, деб ёзади Meduza.
Фото: AP Photo
Журналистларнинг фикрига кўра, кузатув, хусусан, Германия канцлери Ангела Меркель, мамлакат президенти Франк-Вальтер Штайнмаер (ўшанда ташқи ишлар вазири бўлиб ишлаган) ва германиялик сиёсатчи Пер Штайнбрук устидан амалга оширилган. NSAтомонидан мулоқотлари кузатилган сиёсатчиларнинг аниқ сони номаълум.
NSA Даниянинг интернет кабеллари орқали ўтадиган маълумотлардан фойдаланиш имкониятини Дания Ҳарбий разведка хизмати (FE) билан ҳамкорлик орқали қўлга киритган.
2015 йилдан бери разведка хизмати NSA Европа сиёсатчиларига жосуслик қилиш учун FE билан ҳамкорлигидан фойдаланаётганини билар эди, аммо NSA билан алоқаларни тўхтатмасликка қарор қилди.
Кейинчалик бу ҳақда Дания Мудофаа вазирлигига маълумот етиб борди. 2020 йилда вазирлик раҳбари Трине Брамсен NSA’ни Европа сиёсатчиларига жосуслик қилишига йўл қўйгани учун FE’ни қаттиқ танқид қилди. Шунингдек, Брамсен FE’нинг бир қатор раҳбарларини ишдан бўшатди.
NSA Ангела Меркель ва Европа Иттифоқининг бошқа сиёсатчиларига қарши жосуслик қилгани ҳақида биринчи марта Эдвард Сноуден 2013 йилда оммавий ахборот воситаларига АҚШ махсус хизматларининг бутун дунёни кузатувчи дастурлари ҳақида маълумот тақдим этганидан сўнг маълум бўлган.
Германия Меркелнинг NSA томонидан кузатуви бўйича бошлаган тергови далил йўқлиги сабабли 2015 йилда тўхтатилган.
