Олий Мажлис Сенатининг 29 майда ўтказилган ўн бешинчи ялпи мажлисида «Ўзбекистон Республикаси маданият ва санъат ходимлари кунини белгилаш тўғрисида»ги қонун муҳокама этилди. Бу ҳақда Сенат матбуот хизмати хабар берди.
Эслатиб ўтамиз, Шавкат Мирзиёев 2020 йил 26 май куни маданият ва санъат соҳасининг жамият ҳаётидаги ўрни ва таъсирини янада ошириш бўйича фармонни имзолаганди. Фармонда Президент 15 апрелни «Ўзбекистон Республикаси маданият ва санъат ходимлари куни» деб эълон қилиш таклифини маъқулланган.
Сенат хабарида айтилишича, Маданият вазирлиги, «Ўзбеккино» миллий агентлиги, Ўзбекистон бадиий академияси, Ёзувчилар уюшмаси, Ўзбекистон композиторлари ва бастакорлари уюшмаси, Ўзбекистон театр арбоблари уюшмаси, Республика маънавият ва маърифат маркази ҳамда кенг жамоатчиликнинг таклифларини ҳисобга олиб, маданият ва санъатнинг жамиятимиз ижтимоий-маънавий ҳаётида тутган ўрнини ҳисобга олиб, соҳа ходимларини қўллаб-қувватлаш мақсадида қонун билан 15 апрель Ўзбекистон маданият ва санъат ходимлари куни сифатида белгиланмоқда.
Айна пайтда дунёнинг кўплаб давлатларида ушбу сана Халқаро маданият куни сифатида нишонланади. Хусусан, 2008 йилдан Италия, Испания, Россия, Аргентина, Мексика, Куба, Латвия ва Литва каби давлатларда 15 апрель — Халқаро маданият куни Тинчлик байроғи остида нишонланади.
Ўзбекистон маданият вазири Озодбек Назарбеков шу кунга қадар Ўзбекистонда барча соҳа вакиллари учун касб байрами кунлари белгилангани, аммо халқаро миқёсда 15 апрель — Маданият ва санъат ходимлари куни сифатида нишонланса-да, Ўзбекистонда расман қайд этилмаганини айтганди.
Унинг таъкидлашича, 15 апрель санасини Ўзбекистон Республикаси маданият ва санъат ходимлари куни деб эълон қилиш мазкур соҳада фаолият юритаётган раҳбар ходимлардан тортиб, ҳар бир ижодий ва техник ходимларнинг касб байрами сифатида ушбу кунни нишонлаши уларнинг ишчанликни, фидойилиги, ижодда сермаҳсуллигини янада оширади.
Қонун билан, шунингдек, Ўзбекистонда маданият ва санъат соҳасини ривожлантириш, ўзбек миллий маданияти ва санъати нуфузини жаҳон миқёсида ошириш, ёш истеъдод эгаларининг қобилияти ва салоҳиятини рўёбга чиқариш борасида фидокорона меҳнат қилган ва юқори натижаларга эришган фуқароларни айнан мана шу байрам кунида «Маданият ва санъат фидокори» кўкрак нишони билан тақдирланиши кўзда тутилган.
Қонун юзасидан Сенатнинг тегишли қарори қабул қилинди.
Изоҳ (0)