КХДР Давлат кенгаши раиси Ким Чен Ин Кореянинг Бирлашган касаба уюшмалари VIII конгресси иштирокчиларига хат юборди. Хатда меҳнат жамоаларини Корея Меҳнат партиясининг (КМП) сўнгги қурултойида белгиланган миллий иқтисодий мақсадларни амалга оширишга ўзларини бахшида этишга чақирди. Шу билан бирга, мамлакат раҳбари буни «тарихдаги энг қийин йилларда» амалга ошириш лозимлигини таъкидлади. Бу ҳақда Корея Марказий телеграф агентлигига таяниб «ТАСС» хабар берди.

Фото: EPA

«Тарихдаги энг улкан қийинчиликларга қарамай, мамлакатимиз қудрати ва обрўси муттасил ўсиб борди, ички ривожланиш ва инқилоб томон силжиш қобилятимиз сусаймади. Ҳозир биз ҳамма нарсада тақчилликни ҳис қилмоқдамиз, аммо социализм шароитида ҳеч нарсага муҳтож бўлмайдиган, ҳеч кимга ҳасад қилмайдиган бой ва мўл-кўл ҳаёт узоқ куттирмяди».

КХДР етакчиси касаба уюшмалари ўз ишини КМПнинг «миллий иқтисодиётни калибрлаш ва мустаҳкамлашга йўналтирилган» мақсадлари томон олиб борадиган тарзда амалга ошириши лозимлигини эслатиб ўтди.

Бунинг учун иқтисодиётнинг «нафақат мустаҳкам пойдеворини яратиш» ва «одамларнинг яшаш тарзини яхшилаш», балки «ҳаётдан хурсанд одамлардан иборат қудратли социалистик юрт фаровонлигини кафолатлаш зарур».

«Бу шуни англатадики, бизнинг социалистик тизимимиз жон сақлаб қолишдан янги босқичга — янгилик ва трансформацияга ўтиши керак. Янги давр эса ниҳоятда жадал ўсишни талаб қилади», — дея қўшимча қилди Ким Чен Ин.

Апрель ойида КХДР етакчиси Ким Чен Ин мамлакатда кенг миқёсда очарчилик бўлиши мумкинлигини тан олди. КХДРда вазиятнинг ёмонлашувидаги муҳим омиллардан бири бу чегаралар ёпилиши сабабли Хитой билан савдо ҳажмининг кескин пасайиши эди.

Аввалроқ Шимолий Кореяда коронавирус тарқалишига қарши кураш учун ўрнатилган қаттиқ чекловлар шароитида халқаро гуманитар ташкилотлар, хусусан, Жаҳон озиқ-овқат дастурининг сўнгги ходимлари мамлакатни тарк этишга мажбур бўлгани ҳақида хабар берилганди.