Мактабгача таълим вазирининг биринчи ўринбосари Қаҳрамон Олимов лавозимидан озод этилди, вазирнинг бошқа ўринбосарлари эса ўз вазифасини бажарувчи даражасига туширилган. Бу ҳақда Шавкат Мирзиёев бошчилигида 24 май куни ўтказилган ҳудудларда мактабгача таълим муассасалари қамровини кенгайтириш масалалари муҳокамасига бағишланган йиғилишда қайд этилган, деб хабар беради «Gazeta.uz».
Йиғилишда республика бўйича 53 та туманда боғчалар етишмаслиги айтилган. Мисол учун, Сурхондарё вилоятининг Бандихон, Денов, Қумқўрғон, Қашқадарё вилоятининг Чироқчи, Қамаши ва Китоб, Тошкент вилоятининг Янгийўл туманларида қамров даражаси жуда паст.
Давлат раҳбари йиғилишда соҳадаги кўплаб камчиликларни танқидий таҳлил қилган.
Натижада ўз фаолиятида сусткашликка йўл қўйган мактабгача таълим вазирининг биринчи ўринбосари ишдан олинган. Қаҳрамон Олимов мазкур лавозимда 2020 йилнинг 6 мартидан бери фаолият юритиб келаётган эди.
Қолаверса, вазирнинг бошқа ўринбосарлари ҳамда вазирликнинг барча ҳудудий бошқармалари бошлиқлари ўз вазифасини бажарувчи даражасига туширилган. Уларнинг ўз лавозимига лойиқлиги кейинги фаолияти натижадорлиги таҳлили асосида кўриб чиқилиши белгиланган.
Жумладан, мазкур 53 та туманда 34 минг ўринли 2 мингта оилавий боғча ташкил этиш чоралари белгиланган. Бундай боғчаларга қўшимча ишчи ёллашга рухсат бериб, қабул қилинадиган болалар сонини икки баробар ошириш таклифи маъқулланган.
Давлат раҳбари асосийси таълим-тарбия мазмуни эканини таъкидлаб, оилавий боғчаларга ўқув қўлланма ва методик материалларни бепул етказиб бериш вазифасини қўйган. Бунинг учун давлат томонидан жами 30 миллиард сўм ажратилади. Шунингдек, бундай муассасаларни зарур жиҳозлар билан таъминлаш учун 5 фоиз ставкада 30 миллион сўмгача имтиёзли кредитлар берилади.
Олис ҳудудларда мактабгача таълим қамровини кенгайтиришнинг яна бир манбаси — ДХШ асосидаги боғчалардир. Бугунги кунда бундай муассасаларда бир бола учун 50 фоиз харажатлар субсидия қилиб келинмоқда.
Йиғилишда ушбу субсидия миқдорини 75 фоизга етказиш, хусусий боғчаларнинг электр энергияси ва табиий газ тўловининг 50 фоизини давлат бюджетидан қоплаш бўйича кўрсатмалар берилган.
Бундан ташқари, пандемия сабабли тўлиқ қувватда ишламаган давлат-хусусий шериклик боғчаларнинг кредитлари бўйича асосий қарз тўлови муддати ҳам йил якунига қадар узайтирилган.
2021−2022 йилларда 23 та туманнинг олис ва чекка ҳудудларида 50 та мактабгача таълим муассасаси барпо этиш режалаштирилган. Бунинг учун қамров даражаси энг паст ва болалар сони 250 тадан ошган 50 та маҳалла танлаб олинган. Президент ушбу боғчаларни илғор хорижий тажриба асосида қуриш, замонавий жиҳозлар ва қўлланмалар билан таъминлаш юзасидан топшириқлар берган.
Шу билан бирга, мактабгача таълим муассасаларининг 12 минг нафар ходимини ўқитиш ва малакасини ошириш бўйича қисқа муддатли курслар ташкил этилиши белгиланган.
Аввалроқ Ўзбекистонда «Аёллар дафтари»га киритилган ёлғиз аёлларнинг фарзандлари ҳам боғчага имтиёзли рўйхат асосида қабул қилиниши тўғрисида хабар берилганди.
Изоҳ (0)