Россия Федерал божхона хизмати (ФБХ) Россия ҳудуди орқали Голландияга гиёҳванд моддалар олиб кетаётган жиноий гуруҳ қўлга олингани ҳақида хабар берди.
Гуруҳ наркотикларни Россия орқали ҳар бири 200 килограммлик партияларга бўлиб олиб ўтмоқчи бўлган.
ФБХ маълум қилишича, жиноятчилар схемаси ошкор қилингандан сўнг, дастлабки тўрт партиянинг Россия орқали транзити тўхтатилиб, натижада ҳуқуқ-тартибот идоралари ходимлари «олтин ярим ой» мамлакатларидан (Афғонистон, Эрон ва Покистон) олиб келинаётган 810 килограммдан ортиқ героинни мусодара қилди.
Шунингдек, контрабанда каналининг ижрочилари, шериклари ва ташкилотчилари, жумладан, Европа Иттифоқи мамлакатлари фуқаролари ҳибсга олинган.
Ҳодиса юзасидан Жиноят кодексининг 4-қисми 229.1-моддаси (уюшган гуруҳ томонидан ўта катта миқдордаги гиёҳванд моддалар контрабандаси) бўйича иккита жиноят иши қўзғатилди.
ФБХ кетма-кет операцияларда Федерал хавфсизлик хизмати, Ички ишлар вазирлиги, шунингдек Қирғизистон Миллий хавфсизлик давлат қўмитаси ҳам иштирок этганини хабар қилди.
Россия ҳуқуқ-тартибот органлари ходимлари героин харидорларини суд олдида жавобгарликка тортиш учун Европа Иттифоқидаги ҳамкасблари билан биргаликда иш олиб боришга ҳаракат қилгани аммо ҳамкорликка эриша олмаганини таъкидлади.
ФБХ маълумотларига кўра, 2021 йилда россиялик мутахассислар халқаро наркокартелларнинг Шимолий йўналиш деб номланадиган фаолиятини қайта тиклашга уринишлари ва натижада гиёҳванд моддаларнинг Россия Федерацияси ҳудуди орқали транзити ортганини қайд этган.
Аввалроқ Қирғизистоннинг Ўш вилоятида 440 кг гиёҳванд моддалар ортилган юк машинаси қўлга олинганди. Қирғизистон Миллий хавфсизлик давлат қўмитаси ходимларининг айтишича, мусодара қилинган героиннинг қора бозордаги нархи 20 миллион доллардан ошади.
Изоҳ (0)