Чеченистон раҳбари Рамзан Қодировни «шайтон» деб атаб изоҳ қолдирган Instagram фойдаланувчисининг отаси ва қариндошлари Қодировдан кечирим сўради. Уларнинг узри ёзилган иккита видео Грозний телеканалида намойиш  этилди.

Фото: «РИА Новости»

Телеканал маълум қилишича, изоҳ муаллифи 15 ёшли Доғистон фуқароси бўлиб, у отаси билан Подмоскове вилоятида яшайди.

Биринчи видеода ота «15 ёшли ўғлининг нотўғри тарбияси учун» кечирим сўраган ва «келажакда ўғлининг тарбиясига жиддий эътибор қаратишга» ваъда берган. Бу вақтда ўсмир отасининг ёнида ўтирган.

Иккинчи видеода ўсмирнинг беш нафар қариндоши кечирим сўраган. «Ҳурматли Рамзан Ахматович, биз бу ўсмирнинг қариндошларимиз, фарзандимизнинг қилмишини чуқур англаб, сиздан ва сизнинг ҳамроҳларингиздан узр сўраймиз», — деди эркаклардан бири камерага қарай олмасдан.

Қодиров Instagram’да 6,7 миллион обуначига эга @ya_pomoshnik_kra_95 аккаунтидан 17 май куни жонли эфир қилган эди. Эфир давомида у фойдаланувчилардан бирининг: «Сен одам эмассан, шунчаки шайтонсан», — деган изоҳини ўқиб, скриншотга олган. Сўнг кулиб, унга «Ўзинг ҳақингда шахсийдан ёзиб юбор. Қани, қайси биримиз шайтон эканмиз. Шайтонларнинг кўпини йўқ қилганман, сени ҳам йўқ қилишим мумкин» деб кулган.

Рамзан Қодировдан кечирим сўраш ҳолатлари аввал ҳам бир неча марта кузатилган.

Аввалроқ блогер Саша Тилекс Чеченистон раҳбарини пародия қилгани учун узр сўраган. Британиялик блогер Бенжамин (Bald and Bankrupt) эса чечен аёлларини «жонон» деб атагани учун кечирим сўраган.

Ҳатто Украина президенти Владимир Зеленский ҳам Қодировдан кечирим сўрашга мажбур бўлган. У «Квартал 95» студияси Чеченистон раҳбарининг йиғлаб турган видеосидан фойдалангани учун узр сўраган. Зеленскийнинг сўзларига кўра, маълум бир киши унга қўнғироқ қилиб, ушбу видео ҳақида қандай фикрдалигини сўраган. «Агар биз  мусулмон оламидан кимнидир дин даражасида хафа қилган бўлсак бу ўта хунук ҳолат, чунки дин оғриқли ва нозик мавзу», — деган у.

Грозний телерадиокомпаниясининг директори ва Қодировнинг ёрдамчиси Аҳмед Дудаевнинг сўзларига кўра, Чеченистон ҳукумати ҳеч кимни кечирим сўрашга мажбурламайди, чунки бу қонун билан тақиқланган. Аммо агар «кимдир маълум бир халқга хос чегараларни билмаса», у «қандайдир гап айтиб қўйиши, нимадир қилиб қўйиши» мумкин, деди Дудаев. Бундай ҳолда, унга «қадимий хулқ-атвор қоидаларига» кўра у ёки бу ҳаракатлар ёки сўзлар билан чечен халқининг обрўсига путур етказиб қўйилгани тушунтирилади.