Хитойнинг Шэньчжэнь шаҳрида осмонўпар бино тўсатдан тебраниб кетди, деб ёзмоқда BBC. Бинода кўплаб дўконлар жойлашган бўлиб, улардаги минглаб харидорлар зудлик билан бинони тарк этди.
Ҳозирча маҳаллий ҳукумат баландлиги 300 метр бўлган 73 қаватли SEG Plaza биносида содир бўлган ушбу воқеанинг сабабини аниқлай олмади. Бино тахминан 20 йил аввал қурилган бўлиб, у ерда электроника дўконлари ва идоралар жойлашган.
Бино тебранаётган вақти ҳудудда зилзила қайд этилмаган.
Дастлабки текширувларга кўра, бинонинг пойдеворида ҳеч қандай ёриқлар йўқ, ташқи деворлар зарар кўрмаган.
BBC’нинг қайд этишича, 2020 йилнинг май ойида Сюанчжоуда (Хитойнинг Фунсзян провинциясидаги шаҳар округи) коронавирус билан касалланган деб гумон қилинган беморлар карантинга олинган меҳмонхона қулаб тушган эди. Бунинг натижасида 29 киши вафот этган.
Аввалроқ шўнғувчилар орасида машҳур бўлган Галапагос оролларидаги Дарвин аркаси қоятоши қулаб тушгани ҳақида маълум қилинганди. Вазирлик бу ҳодисани эрозия (тошлар ва тупроқларнинг ташқи омил ва сув оқими натижасида емирилиши) билан изоҳлади.
Ҳиндистоннинг ғарбида содир бўлган циклон натижасида эса энг камида 21 киши қурбон бўлди. Яна 96 кишининг бедарак йўқолгани айтилмоқда. Кучли шамол дарахтларни қўпориб ташлади. Оқибатда электр энергияси симларига зарар етиб, юз минглаб аҳоли электр энергиясидан узилиб қолди.
Изоҳ (0)