Зангиотадаги боғча мудираси салкам 1 млрд сўм бюджет маблағини ўзлаштиргани аниқланди

Тошкент вилоятининг Зангиота туманида жойлашган 16-сонли МТТ мудираси 983,5 миллион сўм бюджет маблағларини ўзлаштириб юборгани аниқланди.

Вилоят прокуратура маълумотларига кўра, у амалда ишламаган 37 нафар ходим номига очилган пластик карталарни ноқонуний равишда ўзида қолдиришни талаб қилиб, табелларга сохта маълумотлар киритиш орқали шунча пулни ўзлаштирган.

Қайд этилишича, 2021 йил ўтган даврида таълим муассасалари раҳбарларининг бюджет маблағларини талон-торож қилиши ҳолатлари юзасидан 11 та жиноят иши қўзғатилган.

Аввалроқ Бухорода боғча мудираси 400 доллар пора олаётганда қўлга олингани ҳақида хабар берилган эди.