Фарғона вилоятида божхона бошқармаси ходимлари томонидан ўтказилган тезкор тадбирда 54 миллион сўмлик маиший техникаларнинг мамлакат ҳудудига ноқонуний тарзда олиб кирилишининг олди олинди. Бу ҳақда «Дарё»га бошқарма ахборот хизмати маълум қилди.
Маълум қилинишича, Фарғона вилоят Божхона бошқармаси контрабандага қарши курашиш ва божхона аудити бўлими ходимлари томонидан Марғилон шаҳри ва Қўштепа тумани ҳудудида тезкор тадбирлар ўтказилган.
Тезкор тадбир давомида фуқаро Б.Н. бошқарувидаги Cobalt автомашинаси Марғилон шаҳри ҳудудида тўхтатилиб, ўрнатилган тартибда кўздан кечирилган. Натижада автомашина салони ва юкхонасида хорижда ишлаб чиқарилган ҳамда божхона расмийлаштирувидан ўтганлигини тасдиқловчи ҳужжатлари бўлмаган умумий қиймати 26,4 миллион сўмлик 2 турдаги 33 дона маиший техника борлиги аниқланган.
Шунингдек, Д.Ҳ. бошқарувидаги Cobalt автомашинаси Қўштепа тумани ҳудудида тўхтатилиб, ўрнатилган тартибда кўздан кечирилган. Натижада автомашина салони ва юкхонасида хорижда ишлаб чиқарилган ҳамда божхона расмийлаштирувидан ўтганлигини тасдиқловчи ҳужжатлари бўлмаган умумий қиймати 28 миллион сўмлик 2 турдаги 35 дона маиший техника борлиги аниқланган.
Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.
Изоҳ (0)