АҚШдан Қорақалпоғистонга гуманитар ёрдам сифатида 3 миллион долларлик тиббиёт буюмлари ва жиҳозлари, сунъий нафас олдириш мосламаларини ўз ичига олган 40 футлик ўнта контейнер юборилди. Мазкур гуманитар юк Project C.U.R.E. ва Boeing билан ҳамкорликда амалга оширилди, деб хабар беради «Дунё» агентлиги.

Фото: «Дунё» агентлиги

Маълум қилинишича, Вашингтон штатининг Сиэтл шаҳрида гуманитар ёрдамни юбориш маросимида Ўзбекистоннинг АҚШдаги элчиси Жавлон Ваҳобов ва Boeing компанияси вице-президенти Монта Фрэйзер, Project C.U.R.E. нодавлат ташкилоти президенти Дуглас Жексон ҳамда ушбу ННТнинг хорижий ҳукуматлар билан ишлаш бўйича директори Мелиса Эспости иштирок этган.

Гуманитар юк бўйича келишувлар 2019 йилда элчихона раҳбари ва Project C.U.R.E. президенти Дуглас Жексон билан ташкилотнинг Вест-Груве (Пенсильвания) ва Ҳьюстон (Техас) шаҳарларидаги омборларига ташриф чоғида эришилган.

Таъкидланишича, Қорақалпоғистон соғлиқни сақлаш вазирлиги сўровига биноан Project C.U.R.E. томонидан Сиэтлда шакллантирилган гуманитар юкнинг биринчи жўнатмаси қарийб 6 тоннага тенг. Ушбу юкни Канзас-ситидан Сиэтлга (3 минг километр) Пенсильвания штатидаги ўзбеклар диаспораси фаолларидан бири, логистика компанияси асосчиси Аҳмаджон Одилов амалга оширган.

Шунингдек, АҚШдаги ўзбекистонликлар томонидан асос солинган Give to Get International хайрия ташкилоти кўмагида мустақил экспертларнинг Қорақалпоғистондаги тиббиёт муассасаларининг эҳтиёжларини баҳолаш бўйича харажатлари тўланган.

Boeing вице-президенти Монта Фрэйзер ўз сўзида компания раҳбарияти сўнгги 25 йил ичида Uzbekistan Airways билан яқин ҳамкорлик ўрнатгани ва Ўзбекистоннинг авиация соҳасини ривожлантиришдаги ютуқларини юқори баҳолашини таъкидлаб ўтган.

«Биз Қорақалпоғистонга гуманитар юкнинг биринчи партиясини Dreamliner самолётида юбориш тадбирида иштирок этаётганимиздан жуда хурсандмиз. Айниқса, коронавирус пандемияси билан боғлиқ бугунги синовли вақтда ушбу хайрия тадбирига улуш қўшаётганимиздан мамнунмиз», — дейди Монта Фрэйзер.

Монта Фрэйзер Boeing’нинг Ўзбекистон билан стратегик ҳамкорликни давом эттириш мақсадида Project C.U.R.E. лойиҳасига 100 минг доллар миқдоридаги чек топширган. Ушбу маблағ Оролбўйи аҳолиси учун навбатдаги гуманитар ёрдамни етказишни молиялаштириш учун ишлатилиши қайд этилди.

Гуманитар ёрдам Сиэтлдан Тошкентга Uzbekistan Airways учун Boeing заводида ишлаб чиқарилган еттита сўнгги янги Dreamliner самолётидан бири орқали етказиб берилади. «5 май куни эса беғараз кўмак Тошкентдан Нукус шаҳрига етказилади. Тиббий жиҳозлар билан таъминланган навбатдаги тўртта контейнердаги инсонпарварлик юки ёз фасли охирига қадар Оролбўйи минтақасига юборилади», — дейилади хабарда.

Эслатиб ўтамиз, Президент Шавкат Мирзиёев БМТ Бош Ассамблеясининг 75-сессиясидаги нутқида Оролбўйи минтақасини экологик инновация ва технологиялар ҳудуди деб эълон қилиш ҳақида БМТ резолюциясини қабул қилишни таклиф этганди.