Бугун,

  • USD 11014.01
  • RUB 191.8
  • EUR 10674.78

АҚШда 2021 йил қочқинларни қабул қилиш квотаси 15 мингдан 65 минггача оширилади. Бу ҳақда мамлакат президенти Жо Байденнинг Оқ уй сайтида эълон қилинган тегишли баёнотига асосланиб, «РБК» хабар берди.

Фото: AP Photo

Фото: AP Photo

«Маъмуриятимнинг Конгресс билан аввалроқ олиб борган маслаҳатлашувига асосланиб, мен 2021-молия йилида қабул қилинадиган қочқинлар сонини 62 500 га кўтариш инсонпарварлик масалаларига, шунингдек, мамлакатнинг миллий манфаатларига мос келади, деган қарорга келдим», — дейилади Байденнинг баёнотида.

Шунингдек, баёнотда аввалги маъмурият томонидан АҚШга кириш ҳуқуқидан маҳрум бўлган 2000 киши яқин келажакда мамлакатга қабул қилиниши айтилган. Байден қочқинларни қабул қилиш квотасининг кўпайиши унинг сайловолди дастурининг бир қисми эканини эслаб ўтди.

Қочқинларнинг энг йирик оқими Африкадан келиши кутилмоқда. Ушбу минтақа учун квота 22 минг кишини ташкил этади. Ундан кейин Ўрта Шарқ ва Жанубий Осиё — 13 минг, Шарқий Осиё — 6 минг, Лотин Америкаси ва Кариб ҳавзаси — 5 минг, шунингдек, Европа ва Марказий Осиёдан 4 минг қочқин қабул қилинади. Яна 12,5 минг жой захира сифатида ажратилган.

16 март куни Байден 2021 йилда қочқинларни қабул қилиш квотасини 15 минг миқдорида ушлаб турадиган фармонни имзолади. Бу кўрсаткич 2020- йилнинг октябрида аввалги президент Дональд Трамп томонидан белгилаб қўйилган эди.

ABC News телеканалига берган интервьюсида Байден қочқинларни АҚШга «келмасликка» чақирган. «Ўз шаҳрингиз ёки яшаш жойингизни тарк этманг», — деган эди ўша пайтда АҚШ президенти. Давлат раҳбарининг ушбу қарори президентликка Байденнинг номзодини илгари сурган Демократик партиянинг танқидига учради. Иллинойс штатидан сенатор Дик Дурбин мавжуд вазиятни қабул қилиб бўлмайдиган деб атади. Натижада 18 апрель куни Байден қочқинларни АҚШга киритиш квотасини оширмоқчилигини маълум қилди.

Апрель ойи охирида Мексика билан чегарадаги инқироз шароитида АҚШ Аризона штатининг олти округида фавқулодда ҳолат эълон қилди. Тартибни сақлаш учун округларга Миллий гвардия аскарлари юборилди. Таъкидланишича, штат ҳокимияти чегарачилар томонидан ушлаб қолинаётган муҳожирлар сонининг кескин кўпайиши сабабли шундай қарорга келган.

Эслатиб ўтамиз, АҚШга Марказий Америкадан сўнгги 20 йил ичида рекорд даражада кўп ноқонуний муҳожирларнинг келиши кутилмоқда.

Изоҳ
Асосий янгиликлар