Тожикистондаги Қирғизистон элчиси Жаниш Рустенбеков 27 апрель куни Тожикистон Ташқи ишлар вазирлигига (ТИВ) чақирилди. Бу ҳақда ТИВ Ахборот агентлигига таяниб, Asia Plus хабар берди.
Агентлик хабарига кўра, ташқи ишлар вазирининг ўринбосари Музаффар Ҳусайнзода қирғизистонлик дипломатга Қирғизистон Чегара хизмати вакиллари Тожикистоннинг икки нафар вояга етмаган фуқаросига нисбатан ноқонуний хатти-ҳаракатлари муносабати билан нота топширди.
«Нотада Қирғизистон Давлат чегара хизмати вакиллари томонидан Тожикистоннинг вояга етмаган икки фуқаросига нисбатан Исфара шаҳрининг Ворух жамоати Кулик ҳудудида ноқонуний хатти-ҳаракатлар уюштиргани юзасидан Тожикистоннинг чуқур хавотири билдирилган», — дейилади хабарда.
27 апрель куни Ворух жамоати маъмурияти қирғиз чегарачилари «жамоатнинг икки нафар мактаб ўқувчисини ўғирлаб кетди ва калтаклади» деб хабар берган. Қайд этилишича, болалар Ворух жамоатининг Захматобод маҳалласи яқинидаги яйловда мол боқишган, ҳудуд Тожикистонга қарашли. Ҳодисадан бир соат ўтибгина, тожик чегарачиларининг аралашуви билан қирғиз ҳарбийлари болаларни қайтариб берган.
Музаффар Ҳусайнзода чегара зонасида кескинликка олиб келадиган бундай ноқонуний хатти-ҳаракатларга йўл қўйилмаслигини айтди. У Қирғизистон томонини воқеа учун айбдорларни жавобгарликка тортиш учун шошилинч чоралар кўришга ҳамда Тожикистонни натижалардан хабардор қилишга чақирди.
«Тожикистон икки қардош халқнинг анъаналари ва муштарак маънавий ва маданий қадриятлари асосида тинчлик, барқарорлик ва ўзаро ҳурмат шароитида Қирғизистон билан дўстлик ва яхши қўшничилик муносабатларини изчил ривожлантириш тарафдоридир», — деди Музаффар Ҳусайнзода.
Изоҳ (0)