Туркияда коронавирус эпидемиясининг авж олиши муносабати билан 29 апрелдан 17 майгача тўлиқ локдаун жорий этилмоқда. Бу ҳақда мамлакат президенти Ражаб Тоййиб Эрдўғон маълум қилди деб ёзади «РБК».
«Бугун Вазирлар Маҳкамасининг йигилишида эпидемия билан боғлиқ сўнгги воқеаларни баҳоладик. Рамазондан кейин вазият яхшиланиши учун касалланиш кўрсаткичлари анча паст бўлиши керак. Биз инфекция юқтираётганлар сонининг кунлик ўсишини 5 мингдан камайтиришимиз лозим», — деди Эрдўғон.
Туркияда 29 апрелдан 17 майгача:
- шаҳарлараро саёҳатларга чеклов қўйилди, ҳудудлар ўртасида ҳаракатланиш учун рухсатнома талаб қилинади;
- мактабларда қатнаб ўқиш тўхтатилади, болалар боғчалари ёпилади;
- жамоат транспортининг бандлик даражаси 50 фоиздан ошмаслиги керак;
- аксарият муассасалар ёпилади, Ички ишлар вазирлигининг махсус рўйхатига киритиладиган муассасалар бундан мустасно.
Бунгача Туркия ҳукумати мамлакатда коронавирус тарқалишининг кучайиши фонида 23–25-апрель кунлари тўлиқ комендантлик соати ўрнатган эди.
Туркияда март ойининг охирида коронавирус қайта авж ола бошлади. Шундан сўнг мамлакат президенти Тоййиб Ражаб Эрдўғон 58 та шаҳарни COVID-19 юқтириш хавфи юқори бўлган қизил ҳудуд дея эълон қилди. Мазкур шаҳарларда Туркия аҳолисининг 80 фоизи истиқомат қилади.
Изоҳ (0)