Футзал бўйича Ўзбекистон миллий терма жамоаси тўғридан-тўғри Литвада ўтадиган Жаҳон Чемпионатига йўлланма олди.
Осиё футбол конфедерацияси сўнгги 3 та қитъа биринчиликларидаги натижалардан келиб чиқиб, мундиалга йўл оладиган жамоаларни аниқлади. Ташкилот қарорига кўра, Ўзбекистон, Эрон ва Япония футзал терма жамоалари тўғридан-тўғри Жаҳон Чемпионатида иштирок этиш ҳуқуқини қўлга киритди.
Қолган яна 2 ўрин учун эса қуйидаги 4 та жамоа кураш олиб боради: Ливан, Ироқ, Таиланд ва Вьетнам.
Литвада ўтадиган ЖЧ—2020 мусобақасига йўлланма тақдим этувчи Осиё чемпионати 2020 йилнинг 26 февралидан 8 мартигача Туркманистон пойтахти Ашхобод шаҳрида бўлиб ўтиши керак эди. Аммо коронавирус пандемияси сабаб мусобақа номаълум муддатга қолдирилганди. Эндиликда мазкур мусобақа ўтказилмайдиган бўлди.
Қайд этиш жоиз, футзал бўйича Жаҳон чемпионати 2021 йилнинг 12 сентябридан 3 октябригача бўлган муддатда ўтказилади.
Ўзбекистонлик футзал терма жамоаси ўз тарихида илк марта 2016 йили Колумбияда ўтказилган Жаҳон Чемпионатида иштирок этганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)