Наманган вилоятининг Чортоқ туманидан оқиб ўтган «Катта Наманган канали»дан 5-синф ўқувчисининг жасади топилгани ва қотилликда унинг келинойиси гумонланаётгани тўғрисида хабар берилганди. «Севимли» телеканалининг «Замон» дастурида маълум қилинишича, фожиага оилада юзага келган можаро сабаб бўлган.

Маълумотларга кўра, 5 апрель куни 47-сонли мактабнинг 5-синф ўқувчиси М.А. 2-соат дарсдан сўнг, яқин қариндоши томонидан олиб кетилган ва мактабга қайтиб келмагач, уни бедарак йўқолгани ҳақида хабарлар тарқалган. Мактаб маъмурияти шу куни соат 16:00 ларда ИИБга мурожаат қилган.

Ҳолат юзасидан Чортоқ тумани прокуратураси томонидан терговга қадар текширув ҳаракатлари ўтказилиб, вояга етмаган фуқаронинг йўқолгани шубҳали туюлгани сабаб Жиноят кодексининг 97-моддаси 2-қисми билан жиноят иши қўзғатилган.

Ҳуқуқ-тартибот идоралари томонидан олиб борилган текширувлар натижасида қизчани мактабдан унинг келинойиси олиб кетгани маълум бўлган.

Таъкидланишича, марҳума қизнинг бувиси келинлари аҳил яшашини, ораларида бирор марта низо бўлмаганини таъкидлаб, жиноятга қўл урган келинининг оилада ўғрилик қилганини ва шу сабабли эри ундан кечмоқчи бўлганини айтган.

«Бу келиним ўғрилик қилган. Ўғлим шундан сўнг уни кечирмаган, ўғрини хотин қилмайман, деган. Кенжа келиним эди. Ҳаммасига эри сабабчи, у келиним билан яшамайман деганди. Лекин овсини билан бирор марта уришмаган. Бунга оилавий можаро сабаб бўлган», — дейди қизчанинг бувиси.

Аввалроқ Хоразмда қизига руҳий зўравонлик қилган ота 5 суткага қамалгани, Тошкент вилоятида 14 ёшли қизнинг номусига тегганликда гумонланаётган шахс қамоққа олингани тўғрисида хабар берилганди.