Венесуэланинг Яракуй штатидаги Сукре муниципалитети мери Луис Дуке коронавирус билан касалланганлар яшовчи уйларга махсус тахтачалар илишга кўрсатма берди, деб ёзмоқда Reuters.
Уйларга илинадиган оқ рангли тахтачага қизил диаметрли айлана (тақиқ белгиси) тасвири туширилган.
«Биз халқимизни ҳимоя қиляпмиз. Бу белги илинган уйда коронавирусга чалингани аниқланган ёки гумон қилинаётган одам яшаётганини англатади, одамлар эса бундан огоҳ бўлади», — деб изоҳлади Дуке ўзининг қарорини.
Шунингдек, карантин қоидаларини бузганлар жазо тариқасида озиқ-овқат маҳсулотлари ва таом тайёрлаш учун бериладиган газ каби имтиёзлардан маҳрум қилинади. Бундан ташқари, улар мамлакатда белгиланган энг кам иш ҳақи — тўққиз доллар миқдорида жаримага тортилади.
Ҳуқуқ ҳимоячилари шаҳар кенгашининг бундай кескин чораларига қарши чиқди.
«Биз унинг қарорини қоралашимиз ҳамда ўзининг уйига ҳам тахтача илишга тўғри келмаслиги учун унга мустаҳкам соғлиқ тилашимиз лозим», — деди инсон ҳуқуқлари бўйича адвокат Тамара Сужу.
Reuters’нинг маълумотларига кўра, Венесуэлада коронавируснинг янги тўлқини бошланган, аввалгиси 2020 йилнинг август ойида қайд этилган эди.
Бугунги кунгача 28,4 миллион аҳолиси бўлган Венесуэлада коронавирус билан боғлиқ 170 мингдан ортиқ ҳолат қайд этилди, шундан 154 мингдан ортиғи соғайди, 1705 киши эса вирус қурбонига айланди.
Маълумот учун, Венесуэла президенти Николас Мадуро коронавирусга қарши вакцина учун нефть билан ҳақ тўлашни таклиф қилганди, шунингдек, мамлакатда аҳолини «Спутник V» вакцинаси билан эмлаш бошланган.
Изоҳ (0)