Тошкентда 8 апрель куни Сергели ерусти метросида поезд ярим йўлда тўхтаб қолиб, йўловчилар темир йўл бўйлаб пиёда юришга мажбур бўлгани, «Тошкент метрополитени» УК раҳбарияти воқеа жойида вазиятнинг сабабларини аниқлаётгани ҳақида хабар берилган эди.

Фото: Президент матбуот хизмати

Маълум бўлишича, Сергели йўналишидаги ҳаракатни тўхтатишга контакт рельсининг кронштейни ушлаб туриш қурилмаларидан чиқиб кетиш оқибатида носозлик юзага келгани сабаб бўлган. «Тошкент метрополитени» УК матбуот хизматининг қайд этишича, воқеа юзасидан расмий тергов давом этмоқда, сабаблари ўрганилмоқда.

Тўхтаб қолган метро йўналиши — Олмазор станциясидан Қипчоқ станциясигача бўлган оралиқда вақтинчалик автобус йўналиши ҳаракати йўлга қўйилган эди. «Тошкент метрополитени» УК матбуот хизмати Сергели йўналишидаги поездлар ҳаракати соат 16:45 да тикланганини маълум қилди.

Маълумот учун, Тошкент метрополитенининг Сергели йўналиши 2020 йил 26 декабрь куни ишга туширилган. Бу метро йўналишини лойиҳалаш 2017 йилда бошланган эди. Лойиҳанинг умумий қиймати 82,6 миллион АҚШ долларига баҳоланган.

Эслатиб ўтамиз, 2021 йил 19 март куни Тошкент шаҳар Чилонзор туманидаги «Олмазор» ерости метро бекатидан «Сергели» метро йўналишининг «Чоштепа» ерусти метро бекати томон ҳаракатланиб кетаётган 4 та вагондан иборат йўналиш таркиб техник сабабларга кўра тўхтаб қолганди. Оқибатда ушбу йўналишда ҳаракатланиб келаётган навбатдаги йўналиш таркиб тўхтаб турган вагонга бориб, енгил урилганди.