Toshkentda 8-aprel kuni Sergeli yerusti metrosida poyezd yarim yo‘lda to‘xtab qolib, yo‘lovchilar temiryo‘l bo‘ylab piyoda yurishga majbur bo‘lgani, “Toshkent metropoliteni” UK rahbariyati voqea joyida vaziyatning sabablarini aniqlayotgani haqida xabar berilgan edi.
Ma’lum bo‘lishicha, Sergeli yo‘nalishidagi harakatni to‘xtatishga kontakt relsining kronshteyni ushlab turish qurilmalaridan chiqib ketish oqibatida nosozlik yuzaga kelgani sabab bo‘lgan. “Toshkent metropoliteni” UK matbuot xizmatining qayd etishicha, voqea yuzasidan rasmiy tergov davom etmoqda, sabablari o‘rganilmoqda.
To‘xtab qolgan metro yo‘nalishi — Olmazor stansiyasidan Qipchoq stansiyasigacha bo‘lgan oraliqda vaqtinchalik avtobus yo‘nalishi harakati yo‘lga qo‘yilgan edi. “Toshkent metropoliteni” UK matbuot xizmati Sergeli yo‘nalishidagi poyezdlar harakati soat 16:45 da tiklanganini ma’lum qildi.
Ma’lumot uchun, Toshkent metropolitenining Sergeli yo‘nalishi 2020-yil 26-dekabr kuni ishga tushirilgan. Bu metro yo‘nalishini loyihalash 2017-yilda boshlangan edi. Loyihaning umumiy qiymati 82,6 million AQSh dollariga baholangan.
Eslatib o‘tamiz, 2021-yil 19-mart kuni Toshkent shahar Chilonzor tumanidagi “Olmazor” yerosti metro bekatidan “Sergeli” metro yo‘nalishining “Choshtepa” yerusti metro bekati tomon harakatlanib ketayotgan 4 ta vagondan iborat yo‘nalish tarkib texnik sabablarga ko‘ra to‘xtab qolgandi. Oqibatda ushbu yo‘nalishda harakatlanib kelayotgan navbatdagi yo‘nalish tarkib to‘xtab turgan vagonga borib, yengil urilgandi.
Izoh (0)