Ўзбекистонда барча моддий маданий мероснинг кўчмас мулк объектлари қайта тарихий-маданий экспертизадан ўтказилади. Унинг натижасига кўра, Моддий маданий мероснинг кўчмас мулк объектлари давлат реестри, электрон каталоги, паспорти ва давлат кадастри шакллантирилади, деб ёзмоқда «Gazeta.uz».
Бу ҳақда Президентнинг «Туризм, спорт ва маданий мерос соҳаларида давлат бошқаруви тизимини янада такомиллаштириш чора-тадбирлари тўғрисида»ги фармонида белгиланган.
2021 йил охирига қадар барча спорт ва маданий мерос объектлари ҳақидаги маълумотлар (шу жумладан, паспорти, давлат кадастри) жойлаштириладиган электрон портал яратилади.
Фармон билан моддий маданий мерос объектига туташ ҳудуддаги муҳофаза теграларида капитал қурилиш ишларини ҳамда уларга зарар етказиш билан боғлиқ фаолиятни амалга ошириш тақиқланади. Ушбу тақиқ маданий мерос объектининг ўзгартирилиши мумкин бўлмаган ўзига хос хусусиятларини ва унинг тарихий муҳитини сақлаб қолиш мақсадида жорий этилади.
Туризм ва спорт вазирлиги, Фанлар академияси, Қурилиш вазирлиги, Кадастр агентлиги, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари Бош прокуратура билан биргаликда уч ой муддатда маданий мерос объектларининг қўриқланадиган теграларида ноқонуний қурилган қурилмалар ва бино-иншоотларни бартараф этиш ҳамда уларнинг ер майдонларидан ноқонуний фойдаланишнинг олдини олиш бўйича чора-тадбирларни белгилаши лозим.
2020 йилнинг 1 январига қадар тарихий, илмий, бадиий ёки ўзгача маданий қимматга эга бўлган кўчмас мулк объектларини ҳар бирининг жойига борган ҳолда аниқлаш, янги объект бўйича тарихий-маданий экспертиза ўтказиш ва уларни давлат муҳофазасига олиш таъминланиши, моддий маданий мерос объектларининг қўриқланадиган тегралари, шу жумладан, муҳофаза тегралари, иморатлар қуриш ва хўжалик фаолиятини тартибга солиш тегралари, қўриқланадиган табиий ландшафт тегралари белгиланиши лозим.
Бош прокуратура ташкилий-штат тузилмасида 3 та штат бирлигидан иборат бўлган маданий мерос соҳасидаги қонунчилик ижроси устидан, шу жумладан, маданий меросни муҳофаза қилиш, асрашга доир ишлар ва улардан фойдаланишнинг оқилона ташкил этилишини назорат қилиш бўйича тегишли бўлим ташкил этилади.
2021 йил давомида моддий маданий мерос объектлари, музей, спорт мажмуалари ва бошқа намойиш объектларида электрон тўлов, турникет (лазер-датчикли) ва видео қайд қилиш мосламаларини ўрнатишни, кириш билетларини олдиндан сотиб олишни назарда тутувчи ягона марказлашган электрон тизим жорий этилади. Ушбу тизим намуна сифатида 2021 йил 1 сентябрга қадар Самарқанд шаҳрида жорий этилади.
Бу ҳақда Президентнинг «Туризм ва спорт вазирлиги фаолиятини ташкил этиш тўғрисида»ги фармонида қайд этилган.
Моддий маданий мерос объектларини консервациялаш, реставрация қилиш, тузатиш, таъмирлаш, илмий ва илмий-техник тадқиқ этиш, лойиҳалаш бўйича юқори малакали кадрларни тайёрлаш ва ушбу соҳага етакчи мутахассисларни жалб қилиш мақсадида 2021/2022-ўқув йилидан бошлаб Тошкент архитектура-қурилиш институти ва Самарқанд давлат архитектура-қурилиш институтида маданий мерос объектларини асраш факультетлари очилади, Бухоро архитектура ва қурилиш коллежида Маданий мерос объектларини асраш йўналиши ташкил қилинади.
Ҳужжат билан, шунингдек, давлат муассасаси шаклида «Маданий мерос объектлари реставрацияси дирекцияси» ва босқичма-босқич равишда унинг минтақавий реставрация марказлари ташкил этилади. Давлат бюджетидан маданий мерос объектларини асрашга доир ишлар учун ажратиладиган маблағлар устувор равишда тўғридан-тўғри шартнома асосида «Маданий мерос объектлари реставрацияси дирекцияси»га йўналтирилади.
Изоҳ (0)