Францияда 3 апрель кунидан 4 апрель кунига ўтар кечаси номаълум шахслар тадбиркор ва сиёсатчи Бернар Тапининг уйига бостириб кирди ва уни тўнаб кетди. Бу ҳақда BFM телеканалига таяниб «РБК» хабар берди.

Бернар Тапи

Фото: Reuters

Воқеа Парижнинг жануби-шарқидаги Сена ва Марна департаментида, Тапининг шаҳар ташқарисидаги уйида содир бўлди. Тўрт нафар эркак миллиардернинг уйига бостириб кириб, Бернар ва унинг хотини Доминик Тапига ҳужум қилди ҳамда қимматбаҳо буюмларни ўғирлаб кетди.

Тапининг уйи жойлашган Комб-ла-Виль шаҳарчаси мери Ги Жоффруанинг хабар беришича, жиноятчилар уй эгаларини боғлаб қўйган ва калтаклаган. Доминик шифохонага ётқизилди, ўғрилар уни бир неча марта зарб билан урган. Эндиликда у уйига қайтди.

Жоффруанинг сўзларига кўра, ўғриларнинг шафқатсизлиги, эҳтимол, уларнинг пучга чиққан умиди билан изоҳланади. «Улар хазина топдик деб ўйлаган, лекин олишга арзигулик ҳеч нарса бўлмаган», — деди у.

Прокуратура зўравонлик қўллаган ҳолда ўғрилик қилиш бўйича жиноят иши очди. Жиноятчилар ҳали қўлга олинмади, улар қидирилмоқда.

78 ёшли Бернар Тапи ёшлигида пойгалар ва эстрадада карьера қилишга ҳаракат қилган, лекин муваффақиятга эриша олмаган. 1967 йилда тадбирорлик билан шуғуллана бошлаган, кейин банкротга учраган корхоналарни қайта тиклаш билан шуғулланувчи Bernard Tapie Finances фирмасига асос солган.

1986 йилда 35 миллион долларга «Марсель» футбол клубини сотиб олган ва саккиз йил мобайнида клуб президенти вазифасини бажарган. 1990 йилдан 1993 йилгача Adidas компаниясига эгалик қилган. Ҳозир у Bernard Tapie Group ҳолдинги бошқарувчиси, шунингдек, La Provence ва Corse-Matin газеталарини нашр этувчи La Provence Groupe’нинг 89 фоиз улушига эгалик қилади. 2019 йилда Тапининг бойлиги 200—250 миллион еврога баҳоланган.

2000 йилгача Тапи сиёсат билан шуғулланган ва Франциянинг радикал сўл партияси аъзоси бўлган. 1989 йилдан 1995 йилгача Миллий мажлис депутати, 1992—1993 йилларда шаҳарлар масаласи бўйича вазир, 1994 йилдан 1997 йилгача Европарламент депутати лавозимларида ишлаган.

Аввалроқ Чехиянинг энг бой одами, PPF Group асосчиси Петр Келлнер 27 март куни 56 ёшида Алясканинг Анкориж шаҳри шарқидаги музликда содир бўлган Eurocopter AS50 вертолёти иштирокидаги авиаҳалокат оқибатида вафот этгани ҳақида хабар берилди.

Авиаҳалокат натижасида жами беш киши ҳалок бўлди, олтинчи йўловчи омон қолди ва оғир аҳволда шифохонага ётқизилди. Ҳалокат сабаблари аниқланмоқда. Петр Келлнердан ташқари, Чехиянинг яна бир фуқароси Бенжамен Лароше, икки нафар гид ва учувчи ҳалок бўлди.

Шунингдек, Франциянинг шимоли-ғарбида ичида франциялик миллиардер ва сиёсатчи Оливье Дассо бўлган вертолёт қулаб тушди. Оқибатда Дассо ва учувчи ҳалок бўлди. 2020 йил Дассо Forbes журналининг миллиардерлар рейтингида 4,7 миллиард доллар билан 361-ўринни эгаллаган.