Элвис Преслининг ноёб гитараси ярим миллион долларга сотилди
АҚШдаги GMW Auctions аукционида рок-н-ролл қироли Элвис Преслининг электрогитараси сотилди. Бу ҳақда аукцион уйига таяниб, «Korrespondent.net» хабар берди
Садафлар билан безатилган ноёб гитара Эл Кейси томонидан имзоланган оригинал ғилофида рекорд даражадаги қийматда — ярим миллион долларга сотилган.
Мусиқий анжом 1968 йилнинг 3 декабрида ўтказилган ва NBC телеканали орқали тўғридан-тўғри трансляция қилинган «Қайтиш-68» номли концертда машҳурликка эришган. Ўшанда барча томошабинлар рок-н-ролл қироли ҳамкасби Эл Кейсидан олиб турган ёрқин қизил рангли Ҳагстром Викинг II электрогитараси ёдида қолган. Гитара қора образдаги Элвис фонида чиройли кўринган.
Шундан кейин Эл гитарани хусусий коллексионерга сотиб юборган ва 52 йил давомида у ҳақда бирор маълумот бўлмаган. Вақти-вақти билан у Элвиснинг мусиқий альбоми муқовасида пайдо бўлиб турган.
Аввалроқ Элвис Преслига тегишли бўлган Mercedes аукционга қўйилгани, машинага қўшиқчининг пластинкалари ҳам қўшиб берилаётгани тўғрисида хабар берилганди.
