Бугун,

  • USD 11014.01
  • RUB 191.8
  • EUR 10674.78

28 март, якшанба куни деярли бутун Ўзбекистон бўйлаб кузатилган ёғингарчилик Самарқанд вилоятида айниқса кўп ноқулайликлар келтириб чиқарди. Ижтимоий тармоқларда эълон қилинган, шунингдек, «Дарё» муштарийлари томонидан тақдим этилган видеохабарларга кўра, вилоятнинг Каттақўрғон, Пайариқ, Пахтачи, Қўшработ туманларида сел келиши ҳолатлари кузатилган (ФВВ маълумотларига кўра, Самарқанд вилоятининг 12 фоиз ҳудуди сув тошқини/сел хавфи мавжуд зоналар ҳисобланади).

Каттақўрғон

Каттақўрғон туманининг Олтинсой, Жарбоши, Мойбулоқ қишлоқларига катта сел келган. «Ҳамманинг уйи сув остида қолди... Сув борган сари кўпайяпти», — дейди тумандаги селлардан бирини видеога олган фуқаро.

Каттақўрғондаги селлар оқибатида машиналар ҳам оқиб кетгани ҳақида хабарлар тарқалди. Маҳаллий аҳолининг қайд этишича, «бунақанги сел тарихда бўлмаган».

«Дарё» муштарийининг маълум қилишича, туманнинг «Янгиобод» маҳалласи Кўмир қишлоғига ҳам «жуда катта сел» келган; муштарийнинг алоҳида қайд этишича, «жабрланганлар йўқ».

Каттақўрғон туман «Янгиобод» маҳалласи Кўмир қишлоғига келган сел.

Каттақўрғон туман «Янгиобод» маҳалласи Кўмир қишлоғига келган сел.
Фото: «Дарё» муштарийи

Пайариқ

Пайариқ тумани «Ғаллакор» маҳалласида истиқомат қилувчи «Дарё» муштарийи тақдим этган видеохабарга кўра, «тинимсиз ёғган ёмғир оқибатида» ҳудудда сел кузатилган. «Нариги соҳилга ўтиш имкони йўқ, кўприклар бузилиб кетди», — дейди видео ортидаги овоз соҳиби.

Пахтачи

«Дарё» муштарийи тақдим этган ушбу видеода 28 март куни Пахтачи туманида кузатилган кучли ёмғирдан сўнг юзага келган сел ва унинг оқибатларини кўриш мумкин. Туман фаолларининг маълум қилишича, сел сувларини бартараф этиш чоралари кўрилган.

Қўшработ

Telegram’даги @uzb_meteo каналининг хабар беришича, 28 март куни Қўшработ тумани сойларидан ҳам сел ўтган.

Иштихон тумани

Кучли ёмғир оқибатида Иштихон туманида ҳам жуда катта сел келган. «Узумзорларни сел босиб кетди, уёқда уйларга ҳам сел чиққан — одамларнинг уйини олиб кетяпти... Анча йилдан бери бунақанги кўп сув келмаганди», — дейди маҳаллий аҳоли вакилларидан бири ўз видеохабарида.

Бошқа ҳолатлар

28 март куни ижтимоий тармоқларда фаол айланган видеохабарлардан яна бири — бу селда оқиб кетган эчки-улоқчалардир. «Мана, селда қолиб кетганларини энди топиб келяпмиз. Она-бола эчки ботиб қолган. Буларни энди аста чиқариб олиш керак — ўзи ҳеч қачон чиқолмайди», — дейди оммалашиб кетган видеохабар муаллифи кадр ортида.

Самарқанд вилоятининг тегишли масъул идоралари ҳудуднинг кучли ёмғир ва селлардан кейинги аҳволи ҳақида ҳозирча бирор расмий маълумот берганича йўқ (таққослаш учун, Самарқанд каби бир қатор ҳудудларида тошқин ва селлар кузатилган Навоий вилояти ҳокимлиги 28 мартнинг ўзидаёқ амалдаги вазият юзасидан баёнот берган эди).

Изоҳ
Асосий янгиликлар