28-mart, yakshanba kuni deyarli butun O‘zbekiston bo‘ylab kuzatilgan yog‘ingarchilik Samarqand viloyatida ayniqsa ko‘p noqulayliklar keltirib chiqardi. Ijtimoiy tarmoqlarda e’lon qilingan, shuningdek, “Daryo” mushtariylari tomonidan taqdim etilgan videoxabarlarga ko‘ra, viloyatning Kattaqo‘rg‘on, Payariq, Paxtachi, Qo‘shrabot tumanlarida sel kelishi holatlari kuzatilgan (FVV ma’lumotlariga ko‘ra, Samarqand viloyatining 12 foiz hududi suv toshqini/sel xavfi mavjud zonalar hisoblanadi).
Kattaqo‘rg‘on
Kattaqo‘rg‘on tumanining Oltinsoy, Jarboshi, Moybuloq qishloqlariga katta sel kelgan. “Hammaning uyi suv ostida qoldi... Suv borgan sari ko‘payyapti”, — deydi tumandagi sellardan birini videoga olgan fuqaro.Kattaqo‘rg‘ondagi sellar oqibatida mashinalar ham oqib ketgani haqida xabarlar tarqaldi. Mahalliy aholining qayd etishicha, “bunaqangi sel tarixda bo‘lmagan”.
“Daryo” mushtariyining ma’lum qilishicha, tumanning “Yangiobod” mahallasi Ko‘mir qishlog‘iga ham “juda katta sel” kelgan; mushtariyning alohida qayd etishicha, “jabrlanganlar yo‘q”.
Payariq
Payariq tumani “G‘allakor” mahallasida istiqomat qiluvchi “Daryo” mushtariyi taqdim etgan videoxabarga ko‘ra, “tinimsiz yog‘gan yomg‘ir oqibatida” hududda sel kuzatilgan. “Narigi sohilga o‘tish imkoni yo‘q, ko‘priklar buzilib ketdi”, — deydi video ortidagi ovoz sohibi.Paxtachi
“Daryo” mushtariyi taqdim etgan ushbu videoda 28-mart kuni Paxtachi tumanida kuzatilgan kuchli yomg‘irdan so‘ng yuzaga kelgan sel va uning oqibatlarini ko‘rish mumkin. Tuman faollarining ma’lum qilishicha, sel suvlarini bartaraf etish choralari ko‘rilgan.Qo‘shrabot
Telegram’dagi @uzb_meteo kanalining xabar berishicha, 28-mart kuni Qo‘shrabot tumani soylaridan ham sel o‘tgan.Ishtixon tumani
Kuchli yomg‘ir oqibatida Ishtixon tumanida ham juda katta sel kelgan. “Uzumzorlarni sel bosib ketdi, uyoqda uylarga ham sel chiqqan — odamlarning uyini olib ketyapti... Ancha yildan beri bunaqangi ko‘p suv kelmagandi”, — deydi mahalliy aholi vakillaridan biri o‘z videoxabarida.Boshqa holatlar
28-mart kuni ijtimoiy tarmoqlarda faol aylangan videoxabarlardan yana biri — bu selda oqib ketgan echki-uloqchalardir. “Mana, selda qolib ketganlarini endi topib kelyapmiz. Ona-bola echki botib qolgan. Bularni endi asta chiqarib olish kerak — o‘zi hech qachon chiqolmaydi”, — deydi ommalashib ketgan videoxabar muallifi kadr ortida.Samarqand viloyatining tegishli mas’ul idoralari hududning kuchli yomg‘ir va sellardan keyingi ahvoli haqida hozircha biror rasmiy ma’lumot berganicha yo‘q (taqqoslash uchun, Samarqand kabi bir qator hududlarida toshqin va sellar kuzatilgan Navoiy viloyati hokimligi 28-martning o‘zidayoq amaldagi vaziyat yuzasidan bayonot bergan edi).
Izoh (0)