Германиялик эркак бир йил кутган Ferrari’сини харид қилганидан олти соат ўтиб аварияга учради

Германиялик фуқаро 360 минг еврога янги Ferrari F8 Tributo’ни сотиб олди. Амалга оширилган хариддан олти соат ўтиб, эркак жиддий аварияга учраган бўлиб, деярли бир йил давомида кутилган суперкар қайта тикланишга яроқсиз ҳолга келиб қолган, деб ёзади Motor.

43 ёшли эркак дилерлик марказига ўзига керакли жамланмаган эга қора Ferrari F8 Tributo қачон олиб келинишини деярли бир йил кутган. Суперкар нархи 360 минг еврони ташкил этади. Харид вақтида эркак купега ёзги шиналар кийгизилганига эътибор қаратмаган. Сотиб олинганидан олти соат ўтиб, Ferrari эгаси тезликни оширгани сабаб бошқарувни йўқотган ва жиддий аварияга учраган.

Ferrari бетон тўсиққа урилиши оқибатида унинг орқа ғилдираги узилиб кетган. Бундан ташқари, суперкар йўл-йўлакай микроавтобус билан ҳам тўқнашган ва тўсиқлардан бирини тирнаб ўтган. Авария оқибатида F8 Tributo’нинг олди қисми тўлиқ яксон бўлган. Хавфсизлик ёстиқчалари ишлаб қолгани сабаб ҳайдовчига шикаст етмаган.

488 GTB’нинг вориси ҳисобланувчи Ferrari F8 Tributo 2019 йилда тақдим этилган. Суперкарга 720 от кучига эга 3,9 литрли В8 двигатели ўрнатилган бўлиб, купе соатига 100 километр тезликка 2,9 сонияда эришади. Максимал тезлиги — 340 километр/соат.

Аввалроқ Туркиядаги «мойка»дан чиқиши билан аварияга учраган Ferrari 458 Italia’нинг видеоси тарқалган эди.