Фото: Дунёдаги энг ҳашаматли «Копейка»

Болгариядаги GB Design ательеси тюнерлари ноодатий «ВАЗ-2101» лойиҳасини тақдим этди. Муҳандисларнинг сўзларига кўра, улар дунёдаги энг ҳашаматли «Копейка»ни яратишга муваффақ бўлган, унинг интерьери жаҳондаги премиум автомобилларникидан қолишмайди, деб хабар беради Motor.

Лойиҳанинг биринчи босқичида тюнерлар «Копейка» салонини тўлиқ сочиб ташлаб, автомобилнинг фақат кузовини қолдирган. Шундан сўнг мутахассислар салонни шовқиндан ҳимоялаган ва уни йиғишга киришган. «ВАЗ»нинг завод ўриндиқлари ўрнига Toyota креслолари ўрнатилган. Бутун салон, хусусан, «торпедо» ва эшик атрофлари ёғоч тутқичларга эга жигарранг-оқ табиий чарм билан қопланган.

Интерьернинг энг эксклюзив элементи марказий консоль бўлиб, мутахассислар уни «Копейка» учун махсус ишлаб чиққан. Тюнерлар унга янги узатмалар селектори, магнитола, шунингдек, бир нечта тугмаларни қотирган. Қурилмалар панелида хромланган ҳошияларга эга оқ «шкала»лар пайдо бўлган, руль чамбарагини эса муҳандислар лакланган табиий ёғочдан ишлаган.

Эшикдаги эксклюзив элементлар орасидан совет радиоприёмниги услубидаги динамиклар ҳам ўрин олган, олд ўриндиқлар орқасига эса ретро-сумкалар услубидаги ноодатий ҳамёнлар жойлаштирилган. Ҳашаматли «Копейка» ягона нусхада моделнинг 50 йиллиги муносабати билан яратилган ва ҳозирча сотувга чиқарилмаган.

Маълумот учун, Россияда «ВАЗ-2101» моделларини ишлаб чиқариш 1970 йилда бошланган ва 1988 йилга қадар давом этган. 18 йил давомида Тольяттидаги завод 4,85 миллион нусха «Жигули» ишлаб чиқаришга муваффақ бўлган. «Копейка» номини эса автомобиль 1990 йиллар сўнгида модель номерининг охиридаги бир рақами сабаб олган.