Bolgariyadagi GB Design atelyesi tyunerlari noodatiy “VAZ-2101” loyihasini taqdim etdi. Muhandislarning so‘zlariga ko‘ra, ular dunyodagi eng hashamatli “Kopeyka”ni yaratishga muvaffaq bo‘lgan, uning interyeri jahondagi premium avtomobillarnikidan qolishmaydi, deb xabar beradi Motor.
Loyihaning birinchi bosqichida tyunerlar “Kopeyka” salonini to‘liq sochib tashlab, avtomobilning faqat kuzovini qoldirgan. Shundan so‘ng mutaxassislar salonni shovqindan himoyalagan va uni yig‘ishga kirishgan. “VAZ”ning zavod o‘rindiqlari o‘rniga Toyota kreslolari o‘rnatilgan. Butun salon, xususan, “torpedo” va eshik atroflari yog‘och tutqichlarga ega jigarrang-oq tabiiy charm bilan qoplangan.
Interyerning eng eksklyuziv elementi markaziy konsol bo‘lib, mutaxassislar uni “Kopeyka” uchun maxsus ishlab chiqqan. Tyunerlar unga yangi uzatmalar selektori, magnitola, shuningdek, bir nechta tugmalarni qotirgan. Qurilmalar panelida xromlangan hoshiyalarga ega oq “shkala”lar paydo bo‘lgan, rul chambaragini esa muhandislar laklangan tabiiy yog‘ochdan ishlagan.
Eshikdagi eksklyuziv elementlar orasidan sovet radiopriyomnigi uslubidagi dinamiklar ham o‘rin olgan, old o‘rindiqlar orqasiga esa retro-sumkalar uslubidagi noodatiy hamyonlar joylashtirilgan. Hashamatli “Kopeyka” yagona nusxada modelning 50 yilligi munosabati bilan yaratilgan va hozircha sotuvga chiqarilmagan.
Ma’lumot uchun, Rossiyada “VAZ-2101” modellarini ishlab chiqarish 1970-yilda boshlangan va 1988-yilga qadar davom etgan. 18 yil davomida Tolyattidagi zavod 4,85 million nusxa “Jiguli” ishlab chiqarishga muvaffaq bo‘lgan. “Kopeyka” nomini esa avtomobil 1990-yillar so‘ngida model nomerining oxiridagi bir raqami sabab olgan.
Mavzuga doir: Rossiyada “Kopeyka”ga yodgorlik o‘rnatildi (foto)
Izoh (0)