Raj Kapurning shedevri — “Bobbi” filmi qanday suratga olingan? (foto)

1973-yilda suratga olingan va nafaqat Hindiston, balki boshqa mamlakatlarda ham mashhurlikka erishgan “Bobbi” filmining yaratilishi bilan bog‘liq qiziqarli voqealarni e’tiboringizga havola etamiz.

Ishtirokidagi “Mening ismim masxaraboz” filmi kutilgandek natija qayd qilmaganidan keyin, film rejissori va bosh rol ijrochisi Raj Kapur tushkunlikka tushgan. Suratga olish uchun ganster Karim Laladan qarz olgan Raj, uni qaytarish haqida bosh qotira boshlagan. Qarzdan qutilishi uchun studiyasi va rafiqasining taqinchoqlaridan voz kechishiga to‘g‘ri kelgan. Kapur oyoqqa turishi va hammasi iziga tushishi uchun xit darajasidagi film suratga olishi kerakligini yaxshi bilgan. Shunday vaqtda uning xayoliga do‘sti, yozuvchi Abbos kelgan. “Janob 420”, “Mening ismim masxaraboz” filmlarining ssenariy muallifi bo‘lgan Abbos, unga yordam bera oladigan sujet haqida o‘ylash uchun 3 kun muddat so‘ragan. Bir necha kun o‘tib ssenariy muallifi Rajga ikki o‘spirin: badavlat oilaning o‘g‘li va oddiy baliqchining qizi sevgi hikoyasi haqida so‘zlab bergan. Rajga ushbu g‘oya juda ham yoqib tushgan va Abbosga nafaqat studiyani qutqaradigan, balki kelajak avlodning ham yodida qoladigan film olishga vada bergan. Shundan keyin jamoa tanlashni boshlab yuborgan. Lakshmikant va Pyarelalga musiqa, Patel, Sharma va Anand Bakshiga she’r yozish vazifasi yuklatilgan. Filmdagi qo‘shiqlarni Shaylendra Sinxa va Lata Mangeshkar kuylagan.

Qizig‘i shundaki, bir necha aktrisa filmda Bobbi rolini ijro qilishdan bosh tortgan. Rejissor avvaliga bosh qahramon rolini o‘ynashni opasi, 70-yillarda model sifatida yaxshi tanish bo‘lgan Rekha — Radxaga taklif qilgan. U aktrisa bo‘lishni istamagani uchun rozi bo‘lmagan. Farida Jalol ham ushbu taklifni rad qilib, filmda uncha katta bo‘lmagan boshqa bir qahramonni gavdalantirishni afzal bilgan. Shuningdek, Soma Chatterji va Nita Singh ham Bobbi rolidan bosh tortgan.

Budjet juda kam bo‘lgani sabab rejissor mashhur yulduzlarni rol ijro qilish uchun taklif qila olmagan. Avvaliga Rajesh Khannaning ishtirok etishini istagan Raj, ta’kidlangan sabab tufayli ham serialda bosh qahramonlarni o‘g‘li va do‘stining qizi ijro qilishini ma’qul deb bilgan. Juftlikning otasi roliga o‘sha davrning mashhur aktyorlaridan bo‘lgan Premnatxa va Pranni taklif qilgan. Ular aktyorning eng yaqin do‘stlaridan biri ekani sabab, filmda suratga tushishga rozilik berib, gonorardan voz kechgan.

Salbiy qahramon roli esa Prem Chopraga ishonib topshirilgan. Avvaliga rolning epizodik ekani sabab ikkilangan aktyor, keyinroq rozilik bergan. Unda aktyor tomonidan aytilgan bir jumla, uning karyerasiga muvaffaqiyat olib kelgan. 85 yoshda bo‘lishiga qaramay, turli tadbirlarda muxlis va ishtirokchilar aktyordan ushbu filmdagi so‘zlarini takrorlashni iltimos qiliadi.

“Mening ismim Prem. Prem Chopra.

Intervyulardan birida butun karyerasi davomidagi filmlar va gavdalantirgan qahramonlaridan ko‘ra, aynan shu jumlalar sabab ko‘proq mashhurlik, muvaffaqiyat hamda daromadga ega bo‘lganini ta’kidlagan Chopra, bu buyuk Raj Kapurning daholigidan darak berishini qo‘shimcha qilgan.

Juftlik sifatida suratga tushgan Dimpl Kapadiya va Rishi Kapur esa film premyerasidan keyin haqiqiy yulduz bo‘lib uyg‘ongan. Rishi rol ijro qilish uchun klinikada vazn yo‘qotishdan davolangan. Aynan o‘sha yerda u birinchi sevgisi, Yasmin ismli qiz bilan tanishgan. Matbuotda Rishi va Dimplning munosabatlari haqidagi turli mish-mishlar tarqala boshlaganidan keyin Yasmin aktyor bilan bo‘lgan aloqalarni uzib tashlashga qaror qilgan.

Oradan yillar o‘tib Rishi ushbu filmdagi ijrosi haqida quyidagicha fikr bildirgan: “ ‘Bobbi’ men uchun o‘ziga xos film bo‘lgan. Ammo men ushbu filmdagi ko‘rinishimga qaray olmayman. Shunaqangi yosh va qiltiriq bo‘lganmanki! Hatto hozir ham qanday edim-u, qanday bo‘ldim taqqoslashga uyalaman. Har gal televizor orqali ‘Bobbi’ namoyish qilinganda boshqa kanalga olaman yoki xonadan chiqib ketaman. Bu filmdagi bola men emasman”.

Film premyerasidan yarim yil avval Dimpl, Rajesh Kxannaga turmushga chiqqan. Bu vaqt filmning suratga olish ishlari deyarli tugagan, shunchaki kliplarni yakunlash ishlari qolgan, xolos. Ularning birida Dimplning qo‘lida nikoh xinasi borligini ko‘rish mumkin.

Rejissor kutganidan ham a’loroq natijaga erishgan, ikki yosh iste’dod egalari Rishi va Dimplning kashf etilishiga sababchi bo‘lgan mazkur film bugungi kunda nafaqat Raj Kapur arsenali, balki hind kinosanoatidagi eng yaxshi loyihalardan biri sanaladi.