Транспорт вазирлиги инспекторлари қандай ваколатга эгалиги ва йўл носозлиги ЙТҲларга сабаб бўлганда кўриладиган чоралар ҳақида 3 март куни АОКАда ўтказилган матбуот анжуманида маълумот берилди. Бу ҳақда «Gazeta.uz» хабар қилди.
Анжуманда йўл носозлиги (ямалар) сабабли ЙТҲ содир бўлганда, ҳайдовчига зарар қопланиб бериши ҳақида маълум қилинди.
«Ҳар қандай ЙТҲ содир бўлганда ҳайдовчи йўлнинг айби билан бўлди деб мурожаат қилишга ҳақли. Шунақа мурожаат қилинганда транспорт вазирлиги ҳузуридаги автомобиль йўлларини назорат қилиш инспекцияси томонидан ўрганилади ва хулоса берилади. Агар йўл носозлиги (ЙТҲга) сабаб бўлган бўлса, бу хулоса судга тақдим этилади», — деди Автомобиль ва дарё транспортини ривожлантириш департаменти раҳбари Руслан Рўзметов.
Департамент раҳбарининг аниқлик киритишича, ушбу ҳолатларда ЙТҲ оқибатидаги зарар йўл қайси ташкилот балансида бўлса, ўша ташкилот томонидан қоплаб берилади. «Бунда ҳайдовчи ўз ҳуқуқини билиши, мурожаат қилиши катта аҳамият касб этади» — дея таъкидлади у.
Руслан Рўзметовнинг маълум қилишича, Транспорт вазирлиги автомобиль ташувларини назорат қилиш бошқармаси инспекторлари йўловчилар ва юклар ташувчи автотранспорт воситаларида лицензия карточкалари мавжуд бўлишини, автомобилларда ташувларни амалга ошириш шартларига риоя этилишини, ҳайдовчиларнинг меҳнат ва дам олиш режимига риоя этишини назорат қилади.
Бу тадбирлар йўловчилар тўпланадиган ва юклар ортиладиган ҳамда тушириладиган йирик пунктларда, темир йўл вокзаллари ва станцияларида, дарё портларида, бозорларда, метрополитеннинг охирги станцияларида, автовокзалларда (автостанцияларда), автобус йўналишларининг оралиқ ва охирги тўхташ бекатларида ҳамда ИИВ Давлат йўл ҳаракати хавфсизлиги хизматининг стационар постларида амалга оширилади.
Назоратни амалга оширишда инспекторлар қуйидаги ваколатларга эга:
- автотранспорт воситасининг олдига келиши, фамилиясини, лавозимини айтиб ҳайдовчига ўзини таништириши, ҳайдовчининг талабига кўра хизмат гувоҳномасини кўрсатиши;
- ҳайдовчиларга уларнинг ҳуқуқларини тушунтириши;
- шахснинг ҳуқуқ ва қонуний манфаатларига қатъий риоя қилиши, ўз хизмат вазифасини аниқ бажариши, ҳайдовчига нисбатан маданиятли муомалада бўлиши лозим.
Транспорт вазирлиги матбуот хизмати раҳбари Наврўз Ашурматов вазирлик ходимлари йўл ҳаракати хавфсизлиги хизмати ходимлари билан ҳамкорликда ишлашини қайд этиб ўтди.
«Бизнинг вазирликка тегишли автомобиль ташувларини назорат қилиш инспекторлари ҳеч қачон бир ўзи якка тартибда истаган пайтида ва истаган жойида рейд ўтказмайди. Автомобильни тўхтатиш билан ЙҲХ ходимлари шуғулланишади» — дейди Ашурматов.
Бундан аввал 2020 йилда Тошкент йўлларини яхшилашга салкам 493 млрд сўм йўналтирилгани, ИИВ ЙҲХББ Тошкентда янги йўллар қурилиши, ёпилганлари қайта очилиши ва мавжудлари кенгайтирилиши ҳақида маълум қилгани ҳамда Шавкат Мирзиёев Тошкент шаҳар ҳокимлигига тирбандликлар юзага келаётган кўчаларда қўшимча ҳаракат йўналишларини очиш бўйича топшириқ бергани ҳақида хабар берилганди.
Изоҳ (0)