Ўзбекистон Президентининг «Электротехника саноатини янада ривожлантириш ва маҳаллий маҳсулотларнинг рақобатбардошлигини оширишга доир қўшимча чора-тадбирлар тўғрисида»ги қарори билан мамлакатдаги электротехника ва элетромаиший маҳсулотларни ишлаб чиқарувчилар янги имтиёзларга эга бўлди, деб хабар беради ЎзА.

Фото: «Дарё» / Мадина Нурман

Хусусан, 2021 йил 1 апрелдан 2024 йил 1 январга қадар муддатга ҳисобот даври якунлари бўйича электротехника маҳсулотларини сотишдан тушган тушуми миқдори умумий тушумининг 80 фоизидан кам бўлмаган электротехника тармоғи корхоналарига фойда солиғи ва мол-мулк солиғи бўйича ставкаларни 50 фоизга камайтириш тарзида солиқ имтиёзлари берилади.

Шу билан бирга, солиқ имтиёзлари берилиши муносабати билан бўшаган маблағлар корхоналар томонидан дивидендлар кўринишида тақсимланмайди, янги ишлаб чиқариш қувватларини яратиш ва мавжуд қувватларни модернизация қилишга йўналтирилади.

Шунингдек, қарор билан Молия вазирлигига манфаатдор вазирлик ва идоралар билан биргаликда икки ой муддатда давлат дастурлари доирасида халқаро молия институтлари ва хорижий ҳукумат молия ташкилотлари маблағлари ҳисобидан, бундан ташқари, давлат-хусусий шериклик шартларида амалга ошириладиган лойиҳалар бўйича танлов (тендер) ўтказилганда маҳаллий маҳсулотлар сотиб олинишини назарда тутувчи «миллий контент» тизимини жорий этиш юзасидан таклифларни тайёрлаш вазифаси қўйилган.

Бундан ташқари, Экспортни рағбатлантириш агентлиги 2024 йил 1 январга қадар электротехника ва электромаиший маҳсулотларни барча мамлакатларга, шу жумладан, қўшни давлатларга экспорт қилишда автомобиль, темир йўл ва ҳаво транспортида ташиш харажатларининг 50 фоизини, бироқ маҳсулотлар экспорт қийматининг (транспорт харажатларисиз) автомобиль транспортида 15 фоизидан, темир йўл транспортида 20 фоизидан кўп бўлмаган миқдорда қоплашга субсидиялар тақдим этади.

Электротехника саноатини ривожлантириш жамғармаси маблағлари ҳисобидан тармоқ корхоналарининг ташқи бозорларда ўз маҳсулотларининг жозибадорлигини ошириш бўйича маркетинг тадқиқотлари олиб бориши, тармоқ лойиҳаларининг лойиҳаолди ҳужжатларини (бизнес-режалар, техник-иқтисодий асослар ва бошқалар) ишлаб чиқиши, шунингдек, жаҳон бозорини ўрганиш ва маркетинг таҳлилларини амалга ошириш учун халқаро маълумотлар базаларига (ахборот ресурсларига) уланиши билан боғлиқ харажатларининг 50 фоизигача қисмини қоплайди.

Ҳужжат билан 2022 йил март ойидан бошлаб ҳар йили маҳаллий ва хорижий корхона вакиллари, салоҳиятли инвесторлар, экспертлар ва тармоққа алоқадор бошқа мутахассисларни жалб қилган ҳолда Электротехника ва электроника халқаро савдо кўргазмасини (Uzbek International Electrotechnics & Electronics Fair) ташкил қилиш тўғрисидаги таклиф маъқулланган.

Аввалроқ Тошкент вилоятида электр ва маиший техникаларни ишлаб чиқаришни йўлга қўйиш режалаштирилаётгани тўғрисида хабар берилганди.