Президент Шавкат Мирзиёев раислигида 3 март куни ўтказилган йиғилишда Тошкент шаҳар ҳокими Жаҳонгир Ортиқхўжаев имзоланиши кутилаётган аҳолини уй-жой билан таъминлашга оид янги фармон юзасидан ўз муносабатини билдирди, дея хабар бермоқда «Дарё» мухбири Миролим Исажонов.
«Уй-жой масаласи жуда жиддий, айниқса Тошкент шаҳрида бир неча оилалар бир ҳовлида яшашади. Мазкур фармон уй-жойга муҳтож аҳоли ҳаётини тубдан ўзгартиради. Фармон ижроси таъминланса, оилаларда жанжал, жиноят, ажрим ҳолатлари янада камаяди, деб ўйлайман. Бирга яшагандан кейин турли муаммолар туғилади, гигиена масалалари бор.
Ҳар бир оиланинг ўз ошхонаси, ўз души, ўз ҳожатхонаси бўлса, хотиржам ва бемалол яшайди.
Бир қанча оиланинг битта ҳовлида ҳаёт кечириши қандай эканлигини яхши биламан. Масалан, биз ҳам тўрт ака-ука оиламиз билан битта ҳовлида яшаганмиз. Кейинчалик имкон қилиб алоҳида чиқиб кетганмиз. Лекин у пайтлар одамлар анча сабрли эди, оилаларда жанжал бўлмасди.
Йиғилишда таъкидлаб ўтилган фармон қабул қилинса, уйлар янада сифатли қурилади, одамлар ҳаёти янада фаровонлашади», — деди Ортиқхўжаев.
Бундан аввал уй-жой қурилиш сифатини ошириш масъулияти Очилбой Раматов ва вилоят ҳокимларига юклатилгани, Ўзбекистонда 2021 йил якунигача оғир турмуш шароитига тушиб, бошпанасиз қолган 1000 нафар аёл ижтимоий ижара асосида уй-жой билан таъминланиши ҳамда Шавкат Мирзиёев қурувчи ташкилотларга пандемия даврида берилган имтиёзлар 2021 йил охиригача узайтирилишини таъкидлагани ҳақида хабар берилганди.
Изоҳ (0)