Ўзбекистоннинг Анқарадаги элчихонаси ташаббуси билан Туркий маданият халқаро ташкилоти — TURKSOY ҳамда Анқара шаҳар муниципалитети билан биргаликда «Хива — туркий дунёнинг маданият пойтахти» халқаро дастури доирасида Туркия пойтахтида Муҳаммад ал-Хоразмий ёдгорлигининг очилиш маросими бўлиб ўтди, деб хабар бермоқда «Дунё» ахборот агентлиги.

Фото: «Дунё» ахборот агентлиги

Очилиш маросимида Туркияда амалий ташриф билан бўлиб турган Хоразм вилояти ҳокими Фарҳод Эрмонов, Ўзбекистон элчиси Алишер Аъзамхўжаев, Туркий маданият халқаро ташкилоти — TURKSOY бош котиби ўринбосари Билол Чақичи, Туркия Буюк Миллат мажлисидаги Туркия—Ўзбекистон парламентлараро дўстлик гуруҳи раиси Осман Местен, Анқара шаҳар Кечиўрен муниципалитети ҳокими Турғут Олтинўқ, Анқара губернаторлигининг Кечиўрендаги вакили Ургут Булут, шунингдек, мамлакат илм-фан ва маданият доиралари, ОАВ вакиллари иштирок этди.

Ал-Хоразмий ёдгорлигининг Анқара шаҳрида ўрнатилиши Ўзбекистон Президенти Шавкат Мирзиёев ташаббуси асосида TURKSOY томонидан эълон қилинган «Хива — туркий дунёнинг маданият пойтахти» халқаро дастури доирасида амалга оширилди.

Тадбирда Ўзбекистон элчиси Алишер Аъзамхўжаев Муҳаммад Мусо ал-Хоразмий инсоният тарихи ва тамаддунида алоҳида ўрин тутган буюк шахслардан бири эканини таъкидлади.

Фото: «Дунё» ахборот агентлиги

Қайд этилишича, Хоразмий мероси Ўзбекистоннинг, туркий дунёнинг башарият тарихида муҳим ўрин тутганини намойиш қилиб туради.

Ёдгорлик Анқара шаҳрининг Кечиўрен туманидаги машҳур боғлардан бири — «Жўка водийси» (Иҳламур Вадиси) ҳудудида ўрнатилди. Боғ 2016 йилда қайта таъмирланиб, янгитдан шакллантирилган бўлиб, 4,5 километрлик сунъий канал атрофида жойлашган сайлгоҳ сифатида сайқалланган.

Боғда, шунингдек, масжид, спорт машғулотлари учун махсус майдончалар ва бошқа қулайликлар яратилган. Анқара муниципалитети ва Ўзбекистон элчихонаси ҳамкорлигида ташкил этилган ҳамда ўзбек диаспораси вакиллари томонидан юритилаётган «Фарғона» номли қаҳвахона ҳам шу ерда фаолият кўрсатмоқда.

Муҳаммад ал-Хоразмий ёдгорлигининг расмий очилиш маросимидан сўнг ўзбек миллий кийимлари кўргазмаси ва «Мендирман Жалолиддин» фильмининг намойиши бўлиб ўтди.