Futbol tarixida o‘z klubiga 15 yildan ko‘proq umrini sarflagan ko‘plab futbolchilar bor, ammo ular faoliyatining oxiriga kelib, baribir nisbatan kuchsizroq chempionat yoki jamoaga yo‘l oladi. Bunday futbolchilar sirasiga Stiven Jerrard, Jon Terri, Xavi, Andres Inyesta, Iker Kasilyas va boshqalarni kiritish mumkin. Ammo hozir o‘zini faqat bir jamoaga bag‘ishla(yot)gan futbolchilar haqida fikr yuritamiz.
Lionel Messi — “Barselona”
Messi 13 yoshidan beri “ko‘k-anorranglilar” tizimida bo‘lib kelmoqda. 2003-yilda asosiy jamoada debyut qilgan Leo bu vaqt oralig‘ida 763 ta o‘yin o‘tkazib, 658 ta gol urdi va 34 ta sovrin qo‘lga kiritdi. Bunga yana o‘nlab shaxsiy mukofotlarni ham qo‘shish mumkin. Inkor etib bo‘lmaydigan bir jihat borki, bugungi kunda “Barselona” deganda istalgan inson birinchi navbatda Messini eslaydi. Argentinalikning katalon klubi bilan shartnomasi esa 2021-yilning 30-iyuniga qadar amal qiladi. “O‘zga sayyoralik” klubda qolish yo ketishi faqatgina vaqt masalasi bo‘lib turibdi. Voqealar rivoji qanday ko‘rinish olishidan qat’i nazar Messi “Barselona” tarixidagi eng yaxshi hujumchi bo‘lib qolaveradi.
Serxio Ramos — “Real”
Ramos professional futboldagi ilk qadamlarini “Sevilya”da boshlagan. Markaziy himoyachi 2005-yilda, 19 yoshida “Real”ga o‘tadi. Ramos Madridda o‘tkazgan 16 yili davomida “qaymoqranglilar” bilan 22 ta sovrin yutdi. U 713 ta uchrashuvda maydonga tushib, o‘z hisobiga 103 ta gol yozdirib qo‘ygan. Bundan tashqari Madrid himoya qo‘rg‘oni La Ligada eng ko‘p sariq kartochka qayd etish bo‘yicha ham rekordchi hisoblanadi. Ammo 2020/21-yilgi mavsum yakunida uning “qirollik klubi” bilan shartnomasi yakuniga yetadi, yangi shartnomadan esa hozircha darak yo‘q.
Marselo — “Real”
Aksariyat braziliyalik iqtidorlar singari Marselo ham anchayin yosh vaqtida Yevropaga yo‘l olgan. 2007-yilda, 18 yoshida “Real”ga o‘tgan Marselo ortda qolgan vaqt mobaynida “qaymoqranglilar” safida 530 ta o‘yin o‘tkazgan va 21 ta sovrin qo‘lga kiritgan. Uning “Real” safidagi gollari soni esa 38 tani tashkil qiladi. Umuman olganda, braziliyalik Madridda juda ajoyib mavsumlarni (14 yil) o‘tkazdi. Biroq so‘nggi paytlarda uning klubdagi ishlari unchalik ham yurishmayapti, Zinedin Zidan uni asosan zaxirada qoldirishni afzal ko‘rmoqda. Marseloning “Real” bilan shartnoma 2022-yilning yozida o‘z nihoyasiga yetadi, biroq u katta ehtimol bilan 2020/21-yilgi mavsum yakunida jamoani tark etsa kerak. Afsuski, “Real” o‘z afsonalari bilan munosib xayrlashishni bilmaydi...
Franchesko Totti — “Roma”
Totti haqida to‘xtovsiz gapirish mumkin. Professional faoliyatini 1992-yilda “Roma”da boshlagan Franchesko butsalarini ham aynan Rim klubida (2017-yilda) mixga iladi. U boshqa jamoada o‘ynash variantini hatto o‘ylab ham ko‘rmagan va doimo jamoasiga sodiqligini aytib keldi. Shu sababli unga “Imperator” laqabi beriladi, Totti esa bu nomni ortig‘i bilan oqlaydi. Totti “Roma” bilan 5 ta sovringa ega chiqqan, to‘g‘ri, buni kimdir 25 yil uchun kam deyishi ham mumkin, ammo rimliklar har doim ham o‘zining yulduzli tarkibi va katta moliyaviy imkoniyatlari bilan maqtana olmagan. “Roma” tarkibida 758 ta o‘yinda 307 ta gol urgan Tottiga o‘z vaqtida grand jamoalardan takliflar bo‘lgan. Ammo “Imperator” ularning barchasini rad etib kelgan. Ana shunday takliflardan eng esda qolarlisi 2005-yilda shaxsan “Real” prezidenti Florentino Peres tomonidan bo‘lgandi. Peres o‘sha davrlar hisoblariga ko‘ra Francheskoga “kosmik” maosh va’da qiladi. Totti esa o‘ylab ham o‘tirmasdan Roberto Karlos, Zidan, Guti, Bekhem, Raul va Ronaldo singari futbolchilar bilan bir jamoada o‘ynash imkoniyatidan voz kechadi.
Bu voqeadan ko‘p yillar o‘tgach Florentino Peres shunday degandi: “Totti mening taklifimni rad etgan yagona futbolchi”.
Paolo Maldini — “Milan”
Futbol tarixida Paolo Maldini singari o‘yinchilar juda kam. Chunki Maldini nafaqat faoliyati, balki hayoti davomida faqat bir klub sharafini himoya qilgan. U o‘zi tarbiyalangan “Milan”ning asosiy jamoasida 25 yil (1984—2009-yillar) o‘ynashdan tashqari hozirda klubning texnik direktori ham hisoblanadi. Shu vaqt mobaynida u “rossoneri” bilan 26 ta sovringa ega chiqdi. Maldini nafaqat “Milan”, balki futbol afsonasi sifatida ham millionlar o‘yini tarixida o‘zining o‘chmas izini qoldirgan. Maldinining “Milan”dagi statistikasi quyidagicha: 901 o‘yin, 33 ta gol.
Boshqa maqolalar:
Izoh (0)