Қўқон шаҳрида аҳоли томонидан чиқинди ташланаётган марказий кўчаларга видеокамералар ўрнатилди, деб хабар беради Экология ва атроф-муҳитни муҳофаза қилиш давлат қўмитаси.
Таъкидланишича, Қўқон шаҳрида белгиланмаган жойга чиқинди ташлаб, видеокузатув камераларига суратга олинганлар ижтимоий тармоқларда ёритиб борилади.
Маълум қилинишича, Экология ва атроф-муҳитни муҳофаза қилиш инспекцияси томонидан видеокузатув камералари материаллари асосида белгиланмаган жойга чиқинди ташлаган фуқароларни жаримага тортиш тартиби жорий этилмоқда.
Хусусан, Экология ва атроф-муҳитни муҳофаза қилиш инспекцияси томонидан 26 февраль куни олиб борилган тунги рейд давомида 11 нафар фуқарога жарима ҳужжатлари расмийлаштирилган.
Эслатиб ўтамиз, 2021 йил 1 январдан бошлаб экология, атроф-муҳитни муҳофаза қилиш ва табиатдан фойдаланиш соҳасидаги ҳуқуқбузарликлар ҳақидаги фотосуратлар ва видеоёзувларни юборган шахслар ҳуқуқбузардан ундирилган жарима миқдорининг 15 фоизи миқдоридаги пул мукофоти билан рағбатлантирилиши маълум қилинганди. Шунингдек, белгиланмаган жойларга қаттиқ маиший чиқиндиларни ташлаганлик учун жарималар миқдори оширилган.
Изоҳ (0)