Ҳозирги кунда дунё аҳолисининг 10 фоизидан камроғида COVID-19’га қарши антитана мавжуд. Бу ҳақда Жаҳон соғлиқни сақлаш ташкилоти (ЖССТ) бош тадқиқотчиси Сумя Сваминатанга таяниб, «РБК» хабар берди.

Фото: AP Photo

Дунё аҳолисининг аксарият қисми коронавирус билан касалланган йирик шаҳарларда жамоавий иммунитетига эришилдими, деган саволга жавоб берар экан, мутахассис дунё бўйлаб ўтказилган 500 га яқин тадқиқотларга эътибор қаратди. Унинг сўзларига кўра, тадқиқот натижалари шуни кўрсатдики, ҳозирги кунда дунё аҳолисининг 10 фоизидан камроғида COVID-19’га қарши антитаналар мавжуд.

«Баъзи жойларда, айниқса, аҳоли зич жойлашган шаҳарларда, аҳолининг 50-60 фоизи инфекцияга чалинган ва натижада антитаналар шаклланган ҳудудлар мавжуд. Бироқ бу бутун бир шаҳар, вилоят ёки мамлакатда жамоавий иммунитетга эришилганини англатмайди», — деди у.

Сваминатаннинг сўзларига кўра, кенг миқёсдаги жамоавий иммунитет эмлаш орқали пайдо бўлиши мумкин. Шу сабабли мутахассис таъкидлаганидек, ЖССТ камбағал мамлакатларга коронавирусга қарши вакцина етказиб беришни ўз ичига олган COVAX дастурига иложи борича кўпроқ мамлакатларнинг қўшилишини талаб қилмоқда. Унгача COVID-19 тарқалишини камайтириш учун барча чораларни кўриш керак, дейди мутахассис.

Аввалроқ коронавирусга қарши эмланишнинг жамоавий иммунитетдан устун жиҳатлари маълум қилинган эди. Иммунолог Владимир Болибокнинг сўзларига кўра, COVID-19 билан касалланмаган ва эмлаш жараёнидан ўтмаган киши эҳтиёт чораларини кўриши керак, чунки жамоавий иммунитет уни касалликдан ҳимоя қила олмайди.

Россиялик эпидемиолог Наталья Пшеничная эса COVID-19 мавсумий касалликка айланиши мумкинлигини айтган. Унинг таъкидлашича, мавсумий респиратор инфекциясининг кўпайиши одатда куз ва баҳорда кузатилади, шунинг учун йилнинг ушбу даврида COVID-19 билан касалланиш сони ҳам кўпайиши мумкин.