Toyota kompaniyasi texaslik feldsher Trey MakDenielga yangi 4Runner yo‘ltanlamasini sovg‘a qiladi. Tibbiyot xodimi muzlab qolgan trassada yuz bergan yirik avariya ishtirokchisiga aylangan bo‘lib, pachoqlangan FJ Cruiser yo‘ltanlamasining ichidan chiqishga muvaffaq bo‘lgan va jabrlanuvchilarga yordam berishga kirishgan, deb xabar beradi Motor.
O‘tgan hafta Trey MakDeniel oldindan tibbiyot formasini kiyib olib, o‘zining Toyota FJ Cruiser’ida ishxonasi tomon yo‘l olgan. Anomal ob-havo oqibatida feldsher harakatlangan shosse muzlab qolgan. Qarshisida ko‘plab avtomobillar to‘qnashganini ko‘rgan erkak tormozni bosishga tushgan, biroq yo‘ltanlamas unga bo‘ysunmagan. Natijada boshqaruvni yo‘qotgan Trey yirik YTHning markazida bo‘lib qolgan va uning mashinasiga magistral shatakchisi kelib urilgan.
Shikast yetgan avtomobil ichidan chiqishga muvaffaq bo‘lgan Trey avariya joyiga yetib kelgan qutqaruvchilarga yordam berishga kirishgan. Feldsher oq kiyimda bo‘lgani sabab favqulodda xizmat xodimlari uni o‘z hamkasbi deb o‘ylagan. Erkak qarshilik ko‘rsatmasdan, qutqaruvchilar bilan birga jabrlanuvchilarga yordam berishga kirishgan. Keyinroq u sodir bo‘lgan voqeani aytib bergach esa MakDenielni zudlik bilan shifoxonaga olib kelishgan. Yirik YTH oqibatida 130 dan ortiq avtomobilga shikast yetgan, o‘nlab insonlar jarohat olgan, olti kishi vafot etgan.
Avariya sabab Treyning FJ Cruiser’i qayta tiklashga yaroqsiz holatga kelib qolgan. Feldsherning mardonavor harakatidan xabar topgan Toyota vakillari erkakka o‘zi yaxshi ko‘rgan modelni sovg‘a qilishga qaror qilgan. MakDeniel eng qimmat TRD Pro jamlanmasidagi 4Runner yo‘ltanlamasini tanlagan. Bu kabi modifikatsiyaga ega avtomobil narxi AQShda 50,5 ming dollarni tashkil etadi.
Izoh (0)