Ушбу ҳафтада Ўзбекистоннинг барча ҳудудларида ҳаво ҳарорати февраль ойининг иккинчи ярми учун меъёрий қийматларидан 13-17 даражага юқори бўлган жуда илиқ баҳорий об-ҳаво кузатилди. «Ўзгидромет»нинг ёзишича, 16 февралдан 18 февралгача бўлган даврда максимал ҳарорат баъзи жойларда шу кунларнинг кўп йиллик рекордидан ошди.
18 февралда кундуз куни ҳаво 25-28 даражагача, жанубда 30-32 даражагача исиди. Бу метеорологик кузатувларнинг бутун даври давомида 18 февраль куни учун энг юқори ҳарорат қийматларидир.
19 февраль куни об-ҳаво ўзгара бошлади, осмонни зич булутлар қоплади, шимоли-ғарбий ҳудудларда қорга айланадиган ёмғирлар бошланди. «Об-ҳаво ўзгаришига бугун мамлакатимизга Кавказ ҳудудларидан кириб келаётган совуқ ва нам антициклон сабабчидир», — деб изоҳ берган «Ўзгидромет».
Қайд этилишича, кун давомида республиканинг барча ҳудудларида баъзи жойларда ёмғир, шимолда қор ёғади. Фақат Сурхондарё, Андижон, Наманган, Фарғона вилоятларида ёғингарчилик бўлиши эҳтимоли камроқ. Баъзи жойларда шамол 17-22 метр/секундгача кучаяди, баъзида эса 25-30 метр/секундгача кучайиши мумкин. Ҳаво ҳарорати 15-20 даража илиқ атрофида бўлади, шимолда 0-5 даража илиқдан ошмайди.
Дам олиш кунларида антициклон таъсири сақланиб туради, республика бўйича вақти-вақти билан ёмғир ёғади, баъзи жойларда кучли бўлиши мумкин. Қорақалпоғистонда, Хоразм, Бухоро, Навоий вилоятларида ёғингарчилик кутилмайди. Ҳаво ҳарорати кечалари 2-7 даража илиққача, кундуз кунлари 8-13 даража илиққача пасаяди. Ўртача кеча-кундузлик ҳаво ҳарорати меъёрга яқинлашади.
Ўзбекистоннинг тоғли ҳудудларида қор кўчиши хавфи сақланиб туради.
Аввалроқ «Ўзгидромет» Ўзбекистонда ҳафтанинг иккинчи ярмидан ҳаво ҳарорати пасайиб, ёғингарчилик бўлиши кутилаётганини, ҳафта охирига бориб эса қор аралаш ёмғир ёғиши мумкинлигини маълум қилганди.
Изоҳ (0)